11 чэрвеня ў Францыі адбыўся першы тур парламенцкіх выбараў. Ён прынёс упэўненую перамогу новай ліберальнай партыі La République En Marche! (REM), якая ішла на выбары ў кааліцыі з цэнтрыстамі з MoDem. REM была створаная пад выбарчую кампанію Эманюэля Макрона. Яго перамога вывела партыю ў лідары гонкі.
За REM прагаласавалі каля 32% выбарцаў.
Правацэнтрысцкія рэспубліканцы набралі каля 21%.
На трэцім месцы ідзе Нацыянальны фронт Марыны Лё Пэн, але ён набраў толькі 13%. Гэта менш, чым на мінулых парламенцкіх выбарах, і гэты вынік не дае яму шанцаў на фарміраванне ўласнай парламенцкай групы, але некалькі дэпутатаў Нацфронт правядзе.
Левая «Няскораная Францыя» і камуністы разам здабылі падтрымку прыкладна 14% выбарцаў.
Выбары аказаліся правальнымі для сацыялістаў. Разам са сваімі саюзнікамі, Зялёнымі, яны атрымалі толькі 12% галасоў. Партыя, што дамінавала на французскай палітычнай сцэне з 1940-х, перажывае цяжкі крызіс пасля няўдалага прэзідэнцтва Франсуа Алянда.
Францыя — прэзідэнцкая рэспубліка, але перамога на парламенцкіх выбарах палегчыць Макрону правядзенне рэформаў у эканамічнай сферы.
У выпадку калі Макрон будзе папулярным прэзідэнтам, палітычны спектр Францыі зменіцца. Некалькі дзесяцігоддзяў за ўладу змагаліся правацэнтрысты і левацэнтрысты, галісты і сацыялісты. Цяпер значную ролю могуць адыгрываць лібералы.
З гледзішча беларускіх інтарэсаў, небяспеку ўяўляюць крайне правыя і крайне левыя, Нацыянальны фронт і «Няскораная Францыя», бо яны выступаюць за саступкі пуцінскай Расіі і аслабленне Еўрасаюза, што можа ўскладніць сітуацыю народаў у прасторы між ЕС і Расіяй.
Канчатковы расклад сіл у парламенце стане ясны па выніках другога тура, які пройдзе 18 чэрвеня. Але з вялікай доляй імавернасці партыя Макрона здабудзе каля 400 месцаў у 577-мясцовым Нацыянальным сходзе Францыі. Рэспубліканцы атрымаюць у раёне ста, сацыялісты і «Няскораная Францыя» — па некалькі дзясяткаў.
Цяпер чытаюць
Калеснікава: У 2020‑м я змагалася не супраць Лукашэнкі, а за людзей, свабоду і свабодныя выбары65
Калеснікава: У 2020‑м я змагалася не супраць Лукашэнкі, а за людзей, свабоду і свабодныя выбары
Фядута рэзка адказаў Калеснікавай: За што вы змагаліся ў 2020 годзе, не цікавіць нікога, акрамя мядзведзяў з берлінскага заапарка, якія вас атачаюць2929
Каментары