Дэпутаты ірландскага парламента зацвердзілі кандыдатуру лідара партыі «Фіне Гэл» Леа Варадкара на пасаду прэм'ер-міністра краіны. 38-гадовы палітык стаў самым маладым прэм'ерам у гісторыі Ірландыі.
Акрамя таго, Варадкар стаў першым лідарам краіны, што адкрыта абвясціў пра сваю гомасексуальнасць, і першым прэм'ерам Ірландыі індыйскага паходжання.
«Мяне выбралі, каб кіраваць, але я абяцаю служыць. Мой урад не будзе ні левым, ні правым, бо гэтыя састарэлыя паняцці не спраўляюцца з палітычнымі выклікамі сённяшняга дня. Мэта майго ўрада — пабудаваць рэспубліку магчымасцяў», - заявіў Варадкар, выступаючы перад парламентам.
Пасля гэтага ён адправіўся ў рэзідэнцыю прэзідэнта Ірландыі Майкла Хігінса, з рук якога атрымаў атрыбут выканаўчай улады - «офісную пячатку».
«Як самы малады прэм'ер краіны, ён [Варадкар] будзе гаварыць за новае пакаленне народа Ірландыі. Ён прадстаўляе сучасную і разнастайную Ірландыю і адказвае за яе як ніхто іншы», - сказаў папярэднік Варадкара Энда Кені, саступаючы сваю пасаду.
2 чэрвеня Варадкар атрымаў перамогу на ўнутрыпартыйных выбарах, атрымаўшы 60% галасоў і апярэдзіўшы свайго галоўнага канкурэнта Саймана Кавэнея. «Калі маё абранне сёння нешта значыць, так гэта тое, што рэспубліка вольная ад забабонаў», - заявіў тады Варадкар.
Варадкар нарадзіўся ў сям'і ірландскай медсястры і доктара з Індыі. Бацька новага прэм'ера пераехаў у Ірландыю ў 1970-х гадах, калі гэтая краіна лічылася адной з самых кансерватыўных у Еўропе.
У 2015 годзе, калі ў Ірландыі праходзіў рэферэндум па легалізацыі аднаполых шлюбаў, Варадкар абвясціў, што ён гей.
Ірландыя доўгі час лічылася адной з самых негатыўна настроеных да ЛГБТ-супольнасці краін Еўропы - да 1993 года гомасэксуальнасць у краіне была па-за законам.
Цяпер чытаюць
«Або мы цябе згвалцім, або ты паголіш бараду разам з галавой». Лахвіч расказаў, што з ім адбылося13
«Або мы цябе згвалцім, або ты паголіш бараду разам з галавой». Лахвіч расказаў, што з ім адбылося
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі77
Каментары