Кінуў 36 чалавек на паўмільёна даляраў: чыноўніка-камуніста судзяць за махлярства
Год таму Мікалай Петрамовіч займаў адразу два крэслы: дэпутата Мінгарсавета і намесніка кіраўніка адміністрацыі Партызанскага раёна, дзе ён адказваў за ідэалогію. Сёння ж Петрамовіч на лаве падсудных — яго вінавацяць у махлярстве.
Раніцай 22 верасня ў судзе Першамайскага раёна Мінска прайшло першае пасяджэнне па справе Мікалая Петрамовіча. Былога вертыкальшчыка і чальца праўладнай камуністычнай партыі вінавацяць у махлярстве, дачы хабару.
Петрамовічу 39 гадоў, ён жанаты, мае дваіх малых дзяцей (10 і 7 гадоў). У канцы зімы яго затрымалі і змясцілі пад варту. Раней з’явілася інфармацыя, што Петрамовіч па невядомых прычынах скончыў сваю працу ў адміністрацыі Партызанскага раёна, а пасля знік. Неўзабаве пасля знікнення знаёмыя Мікалая Петрамовіча распавядалі, што той набраў у іх буйныя сумы грошай пасля чаго нібыта збег з краіны.
Па версіі абвінавачвання, цягам некалькіх гадоў Мікалай Петрамовіч падмануў 36 чалавек на суму больш за 1 мільён рублёў (гэта больш за 500 тысяч даляраў).
Пацярпелым чыноўнік абяцаў, напрыклад, прасунуць іх у чарзе на кватэру. Такую сваю «дапамогу» Петрамовіч ацэньваў у некалькі тысяч даляраў, з кагосьці браў 2 тысячы, з кагосьці і чатыры. Некаторым ён абяцаў дапамагачы набыць ці прадаць аўто, але грошы пакідаў сабе (у адным з выпадкаў сума склала 22 тысячы еўра). Камусьці расказваў пра магчымасць набыць кватэру па коштах ніжэй за рынкавыя - для гэтага нібыта трэба было перадаць хабар у Мінгарвыканкам. Перадаць браўся сам Петрамовіч, але грошы ён проста прысвойваў.
Часам грошы ён проста пазычаў у знаёмых, у некаторых нават па некалькі разоў. Сумы складалі таксама па некалькі тысяч даляраў, але крэдыторы больш іх не бачылі.
Мікалай Петрамовіч цалкам прызнаў віну.
Цяпер чытаюць
Куды цяпер едуць вучыцца беларускія студэнты — топ краін і тэндэнцый8
Каментары