Раённыя чыноўнікі смяюцца з бацькоў, якія просяць адкрыць беларускамоўную групу ў садку
У рэдакцыю «Нашай Нівы» звярнуліся бацькі, якія жывуць у Першамайскім раёне Мінска. Яны расказалі пра эпапею з арганізацыяй рознаўзроставай беларускамоўнай групы ў дзіцячым садку — бацькі б'юцца ўжо з паўгода, а раённае ўпраўленне адукацыі толькі дае адпіскі.
«Мы арганізаваліся ў сацыяльных сетках, сабралі бацькоў, якія перажываюць за тое, каб дзеці ў садку сапраўды гаварылі па-беларуску, — расказаў «Нашай Ніве» Сяргей Лісічонак, адзін з рухавікоў працэсу. — Мы вырашылі, што будзем прасіць стварыць рознаўзроставую дзіцячую групу, дзе ўвесь выхаваўчы працэс вёўся б на адной мове. Бо стандартная праблема гэтак званых «беларускамоўных» груп у садках, што там з беларускага — толькі шыльда. Ні дзеці, ні выхавацелі па-беларуску там не гавораць. Не хацелася аддаваць ім беларускамоўнае дзіця, а назад атрымліваць рускамоўнае. Таму мы сабраліся — 23 сям'і, сабралі подпісы і перадалі ва ўпраўленне адукацыі».
Далей, кажа Лісічонак, іх пачалі «мурыжыць».
«Начальніца аддзела адукацыі Першамайскага раёна Людміла Барысенка пачала займацца моўнай эквілібрыстыкай: кажа, маўляў, вы хочаце тым самым парушыць права рускамоўных дзяцей на адукацыю? Гэта смешна ўсё. Па выніку адказ быў наступны: «Аддавайце, як усе», — сказаў бацька.
Дарэчы, адметны наступны факт — толькі ў гэтым раёне дзейнічае шэсць рускамоўных рознаўзроставых груп.
Што замінала Барысенцы разглядзець зварот на карысць бацькоў і стварыць яшчэ адну групу?
На гэтае пытанне адказ невядомы — цягам тыдня «Наша Ніва» спрабавала дазваніцца да Людмілы Барысенка, але на працоўным месцы гэтая чыноўніца адсутнічала ад раніцы і да вечара.
Затое 9 красавіка бацькам прыйшоў ужо афіцыйны ліст ад Барысенкі, у якім яна піша:
«Упраўленне адукацыі не мае магчымасці дадаткова адкрыць рознаўзроставую групу. Упраўленне прапануе бацькам, якія выказалі жаданне адкрыць рознаўзроставую групу, залічыць сваіх дзяцей у беларускамоўныя групы ўстаноў дашкольнай адукацыі», — значыцца ў яе адказе.
Бацькоў такі адказ абурыў, яны палічылі гэта насмешкай з сябе і будуць абскарджваць рашэнне ў вышэйшых інстанцыях.
«Калі я першы раз прыйшла да спецыялістаў па дашкольнай адукацыі, мне сказалі, што стварыць групу не праблема, справа толькі ў адсутнасці ахвотных выхоўваць дзяцей па-беларуску. А калі ахвотныя знайшліся, нам проста адмовілі, — сказала «Нашай Ніве» Вольга Кавальчук, яшчэ адна маці з групы падпісантаў. — Нам не даюць магчымасці пайсці ў адну групу. Напрыклад, у нас есць 8 дзяцей аднаго ўзросту, мы хочам атрымаць накіраванне ў адну групу, каб у дзяцей было хоць нейкае беларускамоўнае асяроддзе, і нават гэта зрабіць немагчыма! Бо ў тыя беларускамоўныя групы, што фарміруюцца на 1 верасня 2018 года, якія нам прапануюць, цалкам пераходзяць дзеці з ясляў і дзеці з агульнай чаргі. Фактычна праблема ігнаруецца».
«Наша Ніва» звярнулася ў Міністэрства адукацыі з просьбай патлумачыць сітуацыю.
Прэс-сакратар ведамства Людміла Высоцкая спачатку сказала, што канфлікт вычарпаны: маўляў, бацькам жа прапанавалі аддаць дзяцей у беларускамоўныя групы.
Тады мы ўдакладнілі, у чым праблема стварыць рознаўзроставую групу, як таго просяць бацькі, калі толькі ў гэтым раёне дзейнічаюць ажно шэсць такіх жа, але рускамоўных груп.
«Тады я не ведаю, чаму яны так адказалі. Ведаю, што праблем няма, каб стварыць гэтыя групы. Нашая пазіцыя такая: ніякіх праблем стварыць такую групу няма», — сказалі ў Міністэрстве.
Цяпер чытаюць
Мінскі медык пайшоў ваяваць за Расію, праз месяц атрымаў цяжкае раненне, а цяпер выбівае выплаты, седзячы ў інвалідным вазку27
Мінскі медык пайшоў ваяваць за Расію, праз месяц атрымаў цяжкае раненне, а цяпер выбівае выплаты, седзячы ў інвалідным вазку
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1414
Каментары