60-гадовы бізнэсовец з Саудаўскай Аравіі (былы настаўнік - багатыя ж там настаўнікі) прапануе выкупіць за 10 мільёнаў даляраў чаравік, кінуты ў прэзідэнта Буша.
60‑гадовы бізнэсовец з Саудаўскай Аравіі (былы настаўнік — багатыя ж там настаўнікі) прапануе выкупіць за 10 мільёнаў даляраў чаравік, кінуты ў прэзідэнта Буша.
Нагадаем, што чорныя чаравікі кінуў у амерыканскага прэзідэнта 29‑гадовы карэспандэнт ірацкага тэлеканалу «Аль‑Багдадзія» Мунтадар аз‑Зэйдзі. Пры гэтым маладзён выгукнуў: «Гэта – развітальны пацалунак ад ірацкага народу табе, сабака!». Карэспандэнта арыштавалі. Цяпер адбываецца праверка, ці не быў ён пад уздзеяннем алкаголю ці наркатычных сродкаў падчас свайго ўчынку.
Лёс «сродку атакі» на сёння невядомы. Паводле адной з версій, абутак мог быць сканфіскаваны ірацкімі службамі бяспекі. Іншая версія палягае ў тым, што чаравікі маглі знесці ў якасці сувеніра супрацоўнікі адміністрацыі Буша.
Аднак калі справа дойдзе да суда і аз‑Зэйдзі будзе прызнаны невінаватым, то ён зможа патрабаваць вярнуць яму «праслаўлены» абутак.
З прапановай выкупіць чаравікі амаль адразу выступіў тэхнічны дырэктар ірацкай футбольнай каманды Аднан Хамад. Ён прапанаваў заплаціць 100 тысячаў даляраў. Паводле Хамада, «ірацкі журналіст Мунтадар аз‑Зэйдзі такім учынкам выказаў стаўленне ўсіх іракцаў да Буша.
Учора іншы ірацкі бізнэсмен прапанаваў заплаціць «любую разумную» суму за пару чаравікоў. І вось саудаўскія СМІ агучылі кошт у 10 мільёнаў.
У разе правядзення ўгоды такія чаравікі стануць самым дарагім абуткам за ўсю гісторыю продажаў.
Лідэр лівійскай рэвалюцыі палкоўнік Муамар Кадафі ўжо абвесціў, што ўзнагароджвае аз‑Зэйдзі лівійскім медалём «За адвагу». Кадафі таксама паведаміў што ўжо больш за 200 адвакатаў выказалі жаданне быць абаронцамі журналіста ў судзе.
У арабаў лічыцца знявагай нават паказаць другому чалавеку падноскі, а ўжо шпурнуць — поўны здзек.
Каментары