Прэзідэнт ЗША Дональд Трамп паставіў пад сумнеў мэтазгоднасць амерыканскага ўваходжання ў Афганістан у 2001 годзе. Такую заяву ён зрабіў у інтэрв'ю CBS News.
У размове пра перамовы з рухам «Талібан», Трамп, адказваючы на пытанне аб тым, ці можна верыць яго лідарам, сказаў: «Ці павінны мы былі першапачаткова туды [ў Афганістан] ўвогуле трапіць — пытанне».
У адказ журналістка нагадала, што рашэнне аб ваеннай аперацыі было прынята пасля тэрарыстычных нападаў 2001 года, ахвярамі якіх сталі амаль тры тысячы чалавек. «Там [у Афганістане] яны і былі спланаваныя», — адзначыла яна.
«Нашы войскі знаходзяцца там ужо амаль 19 гадоў, мы добра змагаемся. (…) І я думаю, яны [ваенныя] стаміліся, усе стаміліся. Нам трэба спыніць гэтыя бясконцыя вайны і вярнуць сваіх хлопцаў дадому », — працягнуў амерыканскі лідар.
Ён таксама адзначыў, што казаў пра неабходнасць вывесці амерыканскія войскі з Афганістана падчас сваёй перадвыбарчай кампаніі. У адказ на меркаванне, што пасля сыходу войскаў баевікі стануць больш актыўнымі і будуць ажыццяўляць новыя тэрарыстычныя атакі, кіраўнік дзяржавы адказаў, што «заўсёды знойдуцца нейкія аргументы». Ён таксама некалькі разоў узгадаў, што ЗША штогод трацяць на ваенную прысутнасць у Афганістане 50 мільярдаў даляраў.
Каментары