На сустрэчы са сваімі прыхільнікамі на Менскай міжнароднай кніжнай выставе нобэлеўская ляўрэатка паведаміла, што ў сакавіку паседжаньні «Інтэлектуальнага клюбу» адновяцца. І першымі гасьцямі будуць вядомы амэрыканскі гісторык Цімаці Снайдэр і беларускі «айцішнік» Віктар Пракапеня, піша радыё «Свабода».
«Што да перапынку ў працы «Інтэлектуальнага клюбу», прабачце мяне, але летась я хварэла. Але з сакавіка мы пачынаем. Спадзяюся, адкрые новы сэзон Цімаці Снайдэр — ён мне паабяцаў. Наступным госьцем будзе беларус Віктар Пракапеня. Ён распавядзе пра будучыню, якая мяне палохае», — распавяла Сьвятлана Алексіевіч.
Набілянтка падзялілася досьведам, як яна нядаўна была ў аэрапорце ў нарвэскім Осла.
«Дзякуй Богу, я была зь перакладчыцай. У аэрапорце амаль няма людзей, якія абслугоўваюць пасажыраў — рэгіструюць усё аўтаматы. А хутка зусім людзей ня будзе — усё будуць рабіць робаты».
Сьвятлана Алексіевіч паабяцала сваім прыхільнікам, што будзе арандаваць для паседжаньняў «Інтэлектуальнага клюбу» самую вялікую залю (на кніжнай выставе, дзе праходзіла сустрэча, заля не магла ўмясьціць усіх ахвотных сустрэцца з нобэлеўскай ляўрэаткай).
***
Цімаці Снайдэр — вядомы амэрыканскі гісторык, прафэсар Ельскага ўнівэрсытэту, адмыслоўца па гісторыі Ўсходняй Эўропы, і ў прыватнасьці, Беларусі, Украіны, Літвы, Польшчы і Расеі новага часу. Дасьледуе праблемы нацыяналізму, таталітарызму, Галакосту.
Віктар Пракапеня — адзін з самых пасьпяховых беларускіх ІТ-бізнэсоўцаў, выканаўчы дырэктар кампаніі VP Capital, адзін зь ініцыятараў і распрацоўшчыкаў «Дэкрэта аб лічбавай эканоміцы».
Раней гасьцямі «Інтэлектуальнага клюбу» былі літаратары Вольга Седакова, Ўладзімер Сарокін, Людміла Ўліцкая, гісторык Рута Ванагайце, рэжысэр Аляксандар Сакураў, палітоляг Станіслаў Бялкоўскі ды іншыя.
Цяпер чытаюць
Пальчыс заклікаў не перапісваць гісторыю 2020 года: Не шукайце лжывых версій мінулага32
Пальчыс заклікаў не перапісваць гісторыю 2020 года: Не шукайце лжывых версій мінулага
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА66
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА6
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары