Гарадзенец стаў адным з самых папулярных расійскамоўных ціктокераў. У яго 2,6 мільёна падпісчыкаў
Відэаблогер Аляксей Саўко стаў адным з самых папулярных ціктокераў у расійскамоўным сегменце папулярнай сацыяльнай сеткі: у яго больш за 2,6 мільёнаў падпісчыкаў. У сваім мікраблогу ён публікуе кароткія відэа, дзе галоўнай фішкай з'яўляецца яго рост — 130 сантыметраў, піша tut.by.
TikTok — гэта сацыяльная сетка, дзе карыстальнікі публікуюць кароткія відэаролікі, якія накладваюцца на папулярную музыку. TikTok вельмі падобны на сторыс, якія выкладваюць карыстальнікі Instagram. Праўда, відэа тут з часам нікуды не знікае.
Аляксей родам з Бераставіцкага раёна. У Гродне ён скончыў школу і мясцовы каледж мастацтваў. Працаваў вядучым, ствараў відэакліпы, а яшчэ займаўся спортам. У сакавіку 2017 года ён стаў абсалютным чэмпіёнам Беларусі і майстрам спорту па паўэрліфтынгу.
Пра свой рост малады чалавек заўсёды кажа з іроніяй. На ім і зроблены асноўны акцэнт у відэаблогу ў сацыяльнай сетцы TikTok.
У сваім інтэрв'ю Tut.by Аляксей казаў:
— У дзяцінстве мяне крыўдзіла, калі ў мяне тыкалі пальцам, але цяпер я згадваю, як я сам глядзеў у той час на афраамерыканцаў. Зараз смешна заўважаць, як маленькія дзеці паказваюць на мяне і кажуць бацькам: «Глядзіце, які дзядзька!»
Цяпер, мяркуючы па інфармацыі ў яго акаўнтах у сацыяльных сетках, малады чалавек жыве на два гарады: у Маскве і Пермі. Дарэчы, і ў іншых сацсетках малады чалавек вельмі папулярны, Напрыклад, у інстаграме ў Аляксея амаль 92 тысячы падпісчыкаў. Там ён распавядае пра сваё жыццё і публікуе фатаграфіі і відэа з вандровак, з канцэртаў, дзе выступае ў якасці вядучага.
Каментары