Машына трывалая, хоць ужо і ва ўзросце — ёй тры дзясяткі гадоў.
У Віцебскім раёне па рацэ Дзвіна курсіруе катар пад назвай «Тытанік». Яго асноўная задача — перавозіць жыхароў Суража з аднаго берага гарадскога пасёлка на другі, піша БелТА.
Сураж падзелены ракой на дзве няроўныя часткі. Усяго тут пражываюць 773 чалавекі, з іх каля 40 — на меншай частцы населенага пункта. Дапамагае дабрацца людзям з аднаго берага на другі водны транспарт.
Як расказаў намеснік начальніка Жыллёва-рамонтнага эксплуатацыйнага прадпрыемства Віцебскага раёна Юрый Сарокін, людзей перавозіць або катар, або паром.
«Па рацэ Дзвіне курсіруе «Тытанік», калі ўзровень вады ў рацэ павышаецца. Звычайна гэта адбываецца вясной або ў перыяд багатых дажджоў», — удакладніў ён.
Пастаянная пасажырка «Тытаніка» — Ірына Доўгая. «Працую ў Суражскай бібліятэцы. Кожны дзень трэба дабірацца на працу праз раку. Добра, што ёсць магчымасць пераправіцца на катэры. Па дарозе аб’езд вялікі, праз Рубу, гэта каля 100 км», — распавяла яна.
Кіруе «Тытанікам» ужо больш за 15 гадоў матарыст Антон Белавусаў.
«Машына трывалая, хоць ужо і ва ўзросце — ёй тры дзясяткі гадоў. Аднак яна спраўна выконвае сваю функцыю — дастаўку людзей. Можа перавозіць 10 чалавек. Яшчэ катэр служыць для буксіроўкі воднага транспарту. Дарэчы, у «Тытаніка» ёсць нават каюта, пры неабходнасці ў ёй можна адпачыць», — расказаў ён.
Пры зніжэнні ўзроўню вады ў рацэ пачне працаваць паром. «Яго ўмяшчальнасць значна большая. Ён служыць для пераправы не толькі людзей, але і транспартных сродкаў. У 2020 годзе была праведзена яго мадэрнізацыя — грузападымальнасць павялічылася да 120 т. Сёння можна бесперашкодна перапраўляць нават лесавозы, камбайны», — дадаў Юрый Сарокін.
Перыяд навігацыі парома даволі працяглы. У мінулым годзе ён скончыўся ў канцы снежня, у гэтым пачаўся з 1 красавіка. Аднак мясцовыя жыхары спадзяюцца, што калі-небудзь два берагі гарпасёлка злучыць мост.
Цяпер чытаюць
У мінскім заапарку правядуць фестываль агню. Кажуць, што жывёлы будуць у памяшканнях, таму ўсё нармальна1
Каментары