Навінку ад Брэсцкага панчошнага камбіната назвалі адпаведна: «кандасок» (ад англ. condom — прэзерватыў і sock — шкарпэткі).
Слоган, які напісаны на ўпакоўцы шкарпэтак, гучыць так: «Нацягнуць лёгка!»
Шкарпэткі звернутыя абаранкам і запакаваныя ў пластык. Калі пакупнік разгубіўся і не ведае, як правільна апранаць шкарпэткі, то на этыкетцы ёсць QR-код — ён вядзе на відэаінструкцыю.
Дырэктар прадпрыемства Сяргей Жаўняровіч расказаў «Нашай Ніве», што ідэя шкарпэтка-прэзерватываў належыць непасрэдна яму:
«Так атрымалася. Я думаў над тым, як павінны выглядаць шкарпэткі, каб было прасцей іх апранаць. Так і нарадзілася ідэя: не нацягваць шкарпэткі, а размотваць іх. Калі запусцілі вытворчасць, паспрабавалі абувацца самі. І сапраўды, так хутчэй! Да таго ж адзін з нашых супрацоўнікаў расказаў, што яго маленькі сын такім чынам здымае шкарпэткі. Так што шкарпэткі ў стане абаранка — цалкам натуральная рэч».
Сяргей Жаўняровіч расказаў, што амаль год спатрэбіўся, каб знайсці пастаўшчыка ўпакоўкі і дызайнера, які б распрацаваў упакоўку.
«А вось тэхналогія скручвання дастаткова простая. У нас шкарпэткі ў абаранак скручвае адзін чалавек», — тлумачыць ён.
Планавалася выпусціць шкарпэтку-прэзерватыў да 1 красавіка.
«Гэта прыкольна, — расказвае Сяргей Жаўняровіч, — нашы навінкі заўсёды выклікаюць у людзей пазітыўныя эмоцыі. Хай то сурвэтка-шкарпэткі або шкарпэткі з майткамі, якія выпускаюцца ў тубусе. Што тычыцца асабіста мяне, то я набуду 50 упаковак такіх шкарпэтак, каб дарыць іх сваім знаёмым, каб браць іх з сабой у выглядзе сувеніраў за мяжу».
Кандасоксы — гэта звычайныя мужчынскія шкарпэткі чорнага колеру. І каштуюць амаль 3 рублі.
Каментары