Сорт бульбы «Маніфест», мех якой Лукашэнка падарыў Пуціну, названы ў гонар песні Сяргея Міхалка
Выканаўца абавязкаў гендырэктара Навукова-практычнага цэнтра НАН па бульбаводстве і плодаагародніцтве Вадзім Маханько, аграном у чацвёртым пакаленні і аўтар некалькіх беларускіх сартоў, расказаў TUT.BY пра самыя папулярныя сарты бульбы:
— У канцы 1970-х — пачатку 1980-х беларускім сартам бульбы аддавалі траціну пасадак у Савецкім Саюзе. Старэйшае пакаленне, напэўна, памятае сарты «Тэмп», «Лошыцкі», «Агеньчык» і «Беларускі».
Ніводнаму гатунку ва ўсім свеце не ўдалося дасягнуць тых плошчаў, якія займалі сарты «Тэмп» і «Лошыцкі». Па палітычных матывах яны не патрапілі ў Кнігу рэкордаў Гінеса, — лічыць Маханько.
Сёння 75% пасадак у Беларусі — гэта нашы сарты. На першым месцы «Брыз», на другім «Скарб». «Скарб» таксама рэкардсмен — 22 гады сорт карыстаецца папулярнасцю ў беларусаў і да гэтага часу не надакучыў нашаму спажыўцу. У дзясятку папулярных сартоў таксама ўваходзяць «Маніфест», «Вектар», «Рагнеда», «Янка», «Уладара», «Лілея».
Хто прыдумляе нашай бульбе такія рамантычныя назвы? У Цэнтры кажуць, што рашэнне заўсёды калегіяльнае. Звычайна варыянтаў шмат.
Напрыклад, «Маніфест» і «Зорачкі» з'явіліся дзякуючы творчасці Сяргея Міхалка з групы «Ляпіс Трубяцкой». Міхалок — вядомы ў Самахвалавічах хлопец, праводзіў тут сваё дзяцінства. Але пра тое, што яго песні натхнілі селекцыянераў, ён наўрад ці ведае.
Назва бульбы павінна быць арыгінальнай і падкрэсліваць, што гэта беларуская распрацоўка.
Дарэчы, мех з «Маніфестам» нядаўна адправіўся да прэзідэнта Расеі — такі падарунак Пуціну Лукашэнка паднёс на Новы год. А яшчэ ў мяшках быў «Вектар», «Рубін» і «Нара». Апошнія два сарты — новыя, у продажы іх яшчэ няма, яны праходзяць выпрабаванні, у тым ліку на ўчастку ў рэзідэнцыі Лукашэнкі.
Каментары