З 1 студзеня 2027 года ў Беларусі пачне дзейнічаць новая рэдакцыя Воднага кодэкса, якая ўводзіць дадатковыя патрабаванні да штучных вадаёмаў на прыватных зямельных участках.
Паводле новых правіл, на адным пляцы дазваляецца мець толькі адну сажалку-копанку. Пры гэтым яе плошча не павінна перавышаць 5% ад агульнай плошчы зямельнага надзелу.
Сажалкай-копанкай лічыцца штучны вадаём з плошчай воднай паверхні не больш за 0,01 гектара (адна сотка) і глыбінёй да двух метраў. Выкарыстоўваць яе можна толькі для асабістых патрэб, напрыклад для паліву або развядзення рыбы без камерцыйнай дзейнасці.
Новае заканадаўства таксама забараняе ствараць на прыватных участках іншыя віды паверхневых вадаёмаў. Акрамя таго, устаноўленыя патрабаванні да размяшчэння сажалкі: яна павінна знаходзіцца не бліжэй чым за тры метры ад берагавой лініі прыродных вадаёмаў і не менш чым за тры метры ад мяжы суседняга пляцу.
Гэтыя нормы будуць распаўсюджвацца не толькі на новыя, але і на ўжо наяўныя вадаёмы. Калі на ўчастку ёсць некалькі сажалак або іх памеры перавышаюць дапушчальныя межы, уладальнікам давядзецца прывесці сваю тэрыторыю ў адпаведнасць з патрабаваннямі закона.
Пры гэтым для стварэння сажалкі-копанкі не спатрэбіцца распрацоўка праектнай дакументацыі. Такі вадаём будзе знаходзіцца ў адасобленым карыстанні ўладальніка ўчастка, таму іншыя людзі змогуць карыстацца ім толькі з яго дазволу. Выключэнне зроблена для тэхналагічных аб'ектаў, у тым ліку супрацьпажарных вадаёмаў.
Каментары
копанка(RUS) = Яма, ров, колодец, выкапываемые для собирания дождевых или грунтовых вод;
см.копань 1.