Былы прэзідэнт Грузіі і экс-губернатар Адэскай вобласці Міхаіл Саакашвілі, якому напярэдадні вярнулі ўкраінскае грамадзянства, вярнуўся ва Украіну.
Самалёт з ім на борце прызямліўся ў кіеўскім аэрапорце «Барыспаль», прыбыўшы з Варшавы. Тут яго сустрэлі журналісты, паплечнікі па партыі «Рух новых сіл» і проста прыхільнікі. Хтосьці з народнымі танцамі і песнямі, а хтосьці — з караваем. Хорам спявалі гімн Украіны.
Сам Саакашвілі запусціў на сваёй старонцы ў Facebook анлайн-трансляцыю свайго прыбыцця.
Былому выгнанніку прыйшлося з цяжкасцю прадзірацца праз натоўп да выхаду. Па дарозе яму падарылі кветкі, хтосьці нават пасадзіў на рукі дзіця.
Іншыя людзі з яго рэйса пераскоквалі праз агароджу, каб абыйсці вялікую чаргу жадаючых сустрэць Саакашвілі.
У рэшце рэшт, экс-губернатару ўдалося выйсці з тэрмінала на вуліцу, дзе ён выступіў з прамовай.
Каментары