Гэтым летам у Беларусі замежных гасцей будуць сустракаць валошкавым марозівам. У Нацыянальным аэрапорце Мінск падчас прылёту міжнародных рэйсаў турысты змогуць пачаставацца самым беларускім пламбірам. Усяго для гасцей падрыхтавана больш за 10 000 порцый дэсерту. Пачаставацца незвычайным марозівам пасля сыходжання з трапа самалёта замежнікі змогуць з 20 па 22 чэрвеня.
Турысты, якія прыязджаюць у Грузію, дзівяцца гасціннай сустрэчы, некаторыя распавядаюць, што ім падарылі бутэльку віна проста на мяжы. Гэтым летам Беларусь таксама запомніцца гасцям як краіна, якую літаральна можна пакаштаваць на смак: замежнікаў у аэрапорце Мінск-2 будуць частаваць новым марозівам з пялёсткамі валошкі і насеннем лёну. Нацыянальны дэсерт з «кветак Радзімы» вырабіла самая старая ў Беларусі фабрыка марожанага «Белы полюс». Яна ж, сумесна з Міністэрствам спорту і турызму Беларусі, арганізавала гасцінную акцыю ў аэрапорце.
«Калі ў Беларусь прыязджаюць турысты, ім перш за ўсё раяць пакаштаваць дранікі. Мы любім класіку, але таксама хочам разнастаіць меню замежнікаў. Васількова марозіва — свайго роду «нацыянальны дэсерт», які можна знайсці толькі ў Беларусі. Гэтую акцыю мы арганізавалі, каб госці нашай краіны пачыналі знаёмства з горадам з чагосьці прыемнага і каларытнага. Думаем, што пламбір з васількоў выдатна справіцца са сваёй місіяй і пазнаёміць гасцей з сапраўднай ветлай і душэўнай Беларуссю», — каментуе намеснік дырэктара па маркетынгу «Белага полюса» Максім Журовіч.
Максім Журовіч, намеснік дырэктара па маркетынгу «Белага полюса».
На працягу трох дзён турыстаў будуць сустракаць валошкавым марозівам. Пасля прылёту міжнародных рэйсаў у аэрапорце Мінск-2 будзе з'яўляцца «капітан» у гарнітуры валошкавага колеру — менавіта ён будзе частаваць іншаземцаў. Усяго для турыстаў падрыхтавалі каля тоны каларытнага беларускага дэсерту.
«У 2018-м колькасць замежнікаў, якія наведалі Беларусь, павялічылася, у параўнанні з папярэднім годам, практычна на паўмільёна: да нас у госці прыехала 4,7 мільёна чалавек. У гэтым годзе мы чакаем яшчэ больш турыстаў: наперадзе Еўрапейскія гульні, сваю справу таксама робіць і трыццацідзённы бязвіз, — распавядае прэс-сакратар Міністэрства спорту і турызму Беларусі Уладзімір Несцяровіч. — Нам бы вельмі хацелася, каб па прыездзе ў нашу краіну кожны госць адразу ж адчуваў беларускую гасціннасць. Думаем, што марозіва з васількоў якраз стане першым прыемным уражаннем для турыстаў і задасць тон іх падарожжа ў Беларусь».
Акрамя пачастунку ў аэрапорце, «Белы полюс» і Міністэрства спорту і турызму таксама падрыхтавалі марозіва для наведвальнікаў экскурсій па Мінску. Кожны дзень з 20 па 30 чэрвеня а 12:00 ад плошчы Якуба Коласа ў Мінску будзе адпраўляцца двухпавярховы аўтобус Open Minsk з незвычайнай праграмай.
Рускамоўных турыстаў навучаць беларускім фразам, дапамогуць падпісаць і адправіць паштоўкі сябрам у розныя куткі свету. «Прывітанне з самага чыстага горада! Дранікі вельмі смачныя. Шлю табе буську!» — замежнікі выберуць, якія фразы найлепшым чынам апісваюць іх уражанні, і пачастуюцца пламбірам з васількоў.
Аўтар фота: Лізавета Гаравая
