Найлепшыя шматсерыйныя стужкі, якія можна ўбачыць у першы месяц зімы. У нашым спісе будуць як прэм’еры, так і серыялы, якія вяртаюцца ў эфір пасля перапынку.
«Вікінгі» (Vikings)
Гістарычная драма. Канада, Ірландыя, 6-ы сезон
Прыгоды легендарнага скандынаўскага конунга (караля) Рагнара Лодбрака і ягоных сыноў прыходзяць да сканчэння. Шосты сезон стане апошнім у гісторыі серыяла.
«Вікінгі» — адзін з найпапулярнейшых серыялаў сучаснасці. Тут ёсць усё: батальныя бітвы, смерці, каханне, сэкс, здрады, палацавыя перавароты, хрысціянства і паганства. Атрымліваецца цалкам сабе выбуховы кактэйль.
У апошніх сезонах, пасля смерці Рагнара Лодбрака (хутчэй за ўсё, гэта зборны вобраз некалькі скандынаўскіх правадыроў) на галоўныя ролі ў серыяле выходзяць ягоныя сыны Б’ёрн Жалезнабокі і Івар Бяскосны. Б’ёрн стаў разважлівым і рахманым, мужным ваяром, але так сабе стратэгам. А вось Івар, хай ён і калека, увасобіў у сабе прагу да ўлады, жорсткасць, хітрасць, розум.
Для нас цікавасць шостага сезона «Вікінгаў» уяўляе яшчэ праз тое, што частка дзеяння будзе адбывацца на славянскіх землях, а адным з герояў стане Вешчы Алег. Дарэчы, ролю жонкі Рагнара — Лагерты — выканала канадская актрыса Кэтрын Уінік. Гэта псеўданім, а сапраўднае яе імя — Кацярына Вінніцкая. Яна нарадзілася ў Таронта, да васьмі гадоў размаўляла толькі па-ўкраінску, хадзіла ва ўкраінскую школу.
«Дзівосная гісторыя місіс Мэйзэл» (The Marvelous Mrs. Maisel)
Гістарычная драма, камедыя. ЗША, 3-і сезон
У Беларусі культура стэндапа яшчэ толькі ў дзіцячым узросце. У той жа час у ЗША — гэта вялікая частка шоу-бізнэсу, якая мае сваю гісторыю і армію прыхільнікаў. Ёсць нямала серыялаў пра стэндапераў, і «Місіс Мэйзэл» адзін з іх.
Мірыям «Мідж» Мэйзэл жыве ідэальным жыццём. У яе ёсць каханы муж Джоэл, а таксама сын і дачка. Дэкарацыямі да гэтага жыцця становіцца Нью-Ёрк 1958 года. Джоэл час ад часу спрабуе сябе ў якасці коміка на сцэнах бараў і начных клубаў. Праўда, ягоныя жарты выходзяць зусім не смешнымі.
У адзін момант жыццё Мідж разбураецца, калі яна дазнаецца, што муж здраджвае ёй з сакратаркай. Жанчына ідзе ў бар, дзе знаходзіць у сабе талент стэндапера. Праўда, першы выхад на сцэну сканчваецца тым, што яе арыштоўваюць за аголеныя грудзі.
«Прастора» (The Expanse)
Касмічная драма. ЗША, 4-ы сезон
Многія лічаць гэты серыял найлепшым з тых, што былі знятыя пра космас за апошнія гадоў дзесяць. Дзеянні серыяла адбываюцца ў тую пару, калі жыхары Зямлі каланізавалі Сонечную сістэму. Марс пасля доўгіх войнаў набывае незалежнасць. Пояс астэроідаў, да якога належыць карлікавая планета Цэрэра, падзелены на зоны пратэктарату між Зямлёй і Марсам.
У гэты самы час цынічнаму і крыху абыякаваму дэтэктыву Мілеру даручана знайсці зніклую дачку мільянера Джульету Маа. Мілер, сам таго не жадаючы, аказваецца ў самым эпіцэнтры інтрыг, палітычных скандалаў, рэвалюцыянераў і бандытаў. Няма такіх з’яў, якія паміж сабой не звязаныя. Гэта адначасова і палітычны трылер, і вельмі якасная фантастыка.
«Вядзьмак» (The Witcher)
Фэнтэзі, прыгоды. ЗША, Польшча, 1-ы сезон
Самая чаканая прэм’ера гэтага месяца. Цыкл кніг пра ведзьмака Геральта з Рывіі польскага пісьменніка Анджэя Сапкоўскага даўно ўжо стаў культавым. Гэта ўжо не толькі літаратура, але і камп’ютарная гульня, і опера, і шмат чаго яшчэ. У Польшчы ўжо здымалі серыял па матывах «Ведзьмака», а цяпер да экранізацыі твору падышоў Netflix.
Падзеі адбываюцца ў выдуманым свеце, які вельмі нагадвае Усходнюю Еўропу (дарэчы, серыял здымалі на тэрыторыі Польшчы, Венгрыі і Славакіі) часоў Сярэднявечча. Геральт — адзін з апошніх «ведзьмакоў», якія яшчэ існуюць у тым свеце. Ён палюе на пачвараў і монстраў, выконваючы замовы багатых апекуноў. Зрэшты, Гаральт — гэта не бяздумная машына для забойстваў. У яго ёсць прынцыпы і перакананні, якія часта ідуць у разрэз з жаданнямі замоўцаў.
Наўрад ці, канечне, «Ведзьмака» чакае шалёны поспех «Гульні тронаў», але паглядзець, што ў выніку атрымалася, безумоўна, варта.
«Па праўдзе кажучы» (Truth be Told)
Юрыдычная драма. ЗША, 1-ы сезон
Стрымінгавы сэрвіс Apple TV+ працягвае набіраць абароты. У снежні яны выпускаюць яшчэ адну чаканую навінку. Серыял заснаваны на кнізе Кэтлін Барбер «Ты спіш?».
У цэнтры аповеду журналістка Попі Парнэл, якая вядзе папулярны падкаст-канал. Поспех да яе прыйшоў пасля раскрыцця гучнага забойства. Аднак праз 18 гадоў пасля таго выпадку ў справе знаходзяцца новыя дэталі, якія могуць прывесці да поўнага пераразгляду і нават вызвалення асуджанага.
Глядзі таксама:
Каментары