Фота Надзеі Бужан
Пра гэта заявіў міністр замежных спраў Літвы Лінас Лінкявічус на сустрэчы з прэм'ер-міністрам Беларусі Сяргеем Румасам, піша БелтА.
«Надышоў час для больш інтэнсіўных адносін, кантактаў і адкрытай размовы, паколькі, нягледзячы на ўсе станоўчыя прыклады (супрацоўніцтва), ёсць і рознагалоссі. Але гэтыя рознагалоссі не з'яўляюцца прычынай не размаўляць. Мы павінны гэта рабіць», — сказаў Лінас Лінкявічус.
Сяргей Румас звярнуў увагу на тое, што Беларусь і Літва — краіны-суседзі, і блізкасць рынкаў, гістарычныя глыбокія культурныя, роднасныя кантакты ствараюць трывалы падмурак, які дазваляе будаваць узаемавыгаднае беларуска-літоўскае супрацоўніцтва.
«Гандлёва-эканамічнае супрацоўніцтва з Літвой сёння развіваецца вельмі добра. У 2019 годзе наш тавараабарот наблізіўся да паўтара мільярдаў даляраў, і на працягу апошніх пяці гадоў беларускія грузы забяспечваюць 30% загрузкі Клайпедскага дзяржаўнага марскога порта», — адзначыў кіраўнік беларускага ўрада.
Актыўную ўзаемную цікавасць пацвярджае візавая статыстыка. Таму, на думку Сяргея Румаса, для ўрадаў дзвюх краін важнай задачай становіцца павышэнне прапускной здольнасці і сінхранізацыя працы пагранічных і мытных службаў Беларусі і Літвы.
У сваю чаргу міністр замежных спраў Беларусі Уладзімір Макей заявіў, Беларусь гатовая абмеркаваць з Літвой ўсе наяўныя праблемныя пытанні і магчымасці кампрамісных рашэнняў на ўзаемавыгаднай аснове.
