Новая літаратурная прэмія імя Васіля Дмытрыюка будзе ўручацца штогод аўтарам з Беларусі, якія пішуць украінскай мовай, за творы, апублікаваныя ў мінулым годзе. Фундатар і арганізатар прэміі — Украінскі навукова-педагагічны саюз «Берагіня» (г. Брэст).
Падчас правядзення 3-й міжнароднай канферэнцыі «Берасцейскі мір у кантэксце гісторыі і культуры Усходняй Еўропы», якая адбылася ў Брэсце 8-9 лютага, адбылося ўручэнне прэміі першым лаўрэатам.
У намінацыі «Найлепшы артыкул» прэмію атрымала кандыдат гістарычных навук з Мінска, намесніца галоўнага рэдактара «Нашай гісторыі» Паўліна Скурко за артыкул «Кніга на Берасцейшчыне ў войнах 17-га стагоддзя» «за прабуджэнне цікавасці да культурных набыткаў рэгіёну и зберажэнне духоўнай спадчыны».
У намінацыі «Папулярызацыя мастацкай творчасці» ўзнагароду атрымаў кампазітар і паэт Арсэн Тэтэрук з Брэста за кнігу-песеннік «Палескія перазвоны», якая складаецца з 2 частак: аўтарскія песні Тэтэрука і ўкраінскія народныя песні, папулярныя ў роднай вёсцы аўтара — Павіцце Кобрынскага раёна.
У намінацыі «Найлепшае навуковае выданне» ўзнагароду атрымаў краязнавец з Пінска, кандыдат фізіка-матэматычных навук Аляксандр Ільін — суаўтар 640-старонкавай кнігі «Нарысы гісторыі Бяроза-Картузскага канцлагеру». Выданне адзначана за «высокі навуковы ўзровень, сцвярджэнне гістарычнай памяці, стварэнне навуковых арыенціраў, значны ўклад у нацыянальнае культурнае адраджэнне».
У намінацыі «Найлепшы мастацкі твор» узнагароду атрымала Наталка Бабіна за раман «Бадай, Будка», які ў мінулым годзе выйшаў украінскай мовай у Беларусі ды Украіне, за «своеасаблівасць ідэі, сцвярджэнне высокіх духоўных каштоўнасцяў, выразную грамадзянскую пазіцыю».
Наталка Бабіна: Я не магла пісаць свой другі раман на іншай мове, чым украінская
Васіль Дмытрыюк, чыім іменем названая прэмія — знакавая фігура ўкраінскага руху ў Берасці ў міжваенны час. Доктар, пасол Сейму Польшчы ад блоку нацыянальных меншасцяў, кіраўнік украінскай партыі «Сельроб» і «Прасвіты на Палессі», аўтар мемуараў «Дарогамі вайны і міру». 130 гадоў з дня яго нараджэння адзначалася 1 студзеня 2020 года.
Каментары