1340 студэнтаў і выпускнікоў мехмата БДУ запатрабавалі правядзення новых выбараў і пакарання вінаватых 

1340 студэнтаў і выпускнікоў механіка-матэматычнага факультэта Белдзяржуніверсітэта звярнуліся да дзяржаўных органаў Беларусі.

Вось што яны пішуць.

«Мы не можам мірыцца з гвалтам і не хочам маўчаць.

9 жніўня ў нашай краіне прайшлі выбары прэзідэнта Рэспублікі Беларусь. Гэтыя выбары прайшлі з масай парушэнняў:

• выбары не былі адкрытымі і галоснымі;
• незалежныя назіральнікі не былі дапушчаны на выбарчыя ўчасткі;
• на многіх выбарчых участках была завышана колькасць тых, хто прагаласаваў;
• на сяброў выбарчых камісій аказваўся ціск;
• многія выбарчыя ўчасткі не прадэманстравалі пратаколы аб выніках галасавання.

Усе вышэйпералічаныя факты супярэчаць Выбарчаму кодэксу Рэспублікі Беларусь, а таксама Канстытуцыі Рэспублікі Беларусь, а значыць, праведзеныя выбары не павінны быць прызнаныя.

Апошнія некалькі дзён мы назіраем вельмі жорсткае выкарыстанне сілы да мірных пратэстоўцаў з боку сілавых структур. Многія нашы суайчыннікі былі збітыя і абстраляныя падчас мірных дэманстрацый. Некалькі чалавек было забіта. Было затрымана шмат грамадзян, якія не мелі непасрэднага дачынення да дэманстрацый і пратэстаў. Людзей у турмах збіваюць і катуюць. Такія нечалавечыя дзеянні сілавых структур незаконныя, непрымальныя і парушаюць Канстытуцыю Рэспублікі Беларусь, паколькі чалавек, яго правы, свабоды і гарантыі іх рэалізацыі з'яўляюцца найвышэйшай каштоўнасцю і мэтай грамадства і дзяржавы (артыкул 2 Канстытуцыі Рэспублікі Беларусь).

Мы не можам спакойна назіраць за ўсім гэтым. Мы хочам жыць у краіне, дзе выбары праходзяць сумленна, без фальсіфікацый і на роўных умовах для ўсіх кандыдатаў, дзе міліцыя забяспечвае бяспеку грамадзян, а не пагражае іх жыццю і здароўю.

Мы хочам павагі нашых правоў і свабод, уключаючы свабоду слова, меркаванняў і сходаў. Мы хочам не баяцца выходзіць на вуліцу ў сваім горадзе. І мы хочам адкрыта выказаць свой пратэст.

Мы, ніжэйпадпісаныя, патрабуем:

1. спыніць задушэнне мірных пратэстаў сілавым шляхам і спыніць гвалт у дачыненні да мірных грамадзян;
2. прыцягнуць да адказнасці ўсіх сілавікоў, вінаватых у збіцці і забойствах пратэстоўцаў;
3. вызваліць усіх палітвязняў і асоб, затрыманых за ўдзел у мірных пратэстах, і спыніць іх далейшыя пераследы;
4. прызнаць праведзеныя 9 жніўня выбары несапраўднымі і правесці новыя сумленныя выбары».

• 1
• 0
• 0
• 0
• 0
• 0
• 0
• 0