Алег Гайдукевіч: Мая жонка тры дні плакала, калі пабачыла, што рабілася пасля 9 жніўня
2 верасня адбылася сустрэча ініцыятыўнай групы з дэпутатам Алегам Гайдукевічам наконт ініцыятывы па яго адкліканні. Дэпутат сказаў, што не баіцца працэдуры, а таксама заявіў, што не пакінуў без разгляду ніводнага звароту грамадзян па фактах гвалту ў дачыненні да пратэстуючых і звярнуўся з адпаведнымі запытамі ў праваахоўныя органы, піша Tut.by.
Гайдукевіч падкрэсліў, што накіраваў у МУС і Следчы камітэт запыты па ўсіх фактах звароту да яго выбаршчыкаў, «каб яны неадкладна прынялі рашэнне і разабраліся».
Ён упэўнены, што цяпер трэба рабіць больш.
— Мы павінны стварыць камісію ў парламенце і разбірацца ў гэтым пытанні з удзелам зацікаўленых асоб.
Дэпутат таксама пракаментаваў факт адсутнасці крымінальных спраў, звязаных з цялеснымі пашкоджаннямі ўдзельнікам акцый пратэсту, у тым ліку тых, якія прывялі да смерці.
— Лічу, што цяпер мы павінны дачакацца вынікаў праверкі, якую вядзе міжведамасная камісія, — адзначыў Гайдукевіч, пагадзіўшыся, што па факце гвалту справы ўсё-такі трэба пачынаць.
Ён таксама пракаментаваў інфармацыю пра шматлікія фальсіфікацыі на мінулых прэзідэнцкіх выбарах.
— Я як партыя 10 гадоў кажу, што трэба мяняць выбарчае заканадаўства і выбары павінны ісці па партыйных спісах.
Гайдукевіч дадаў, што атрыманыя ім паведамленні аб парушэннях на выбарах адправіў, як і належыць, у ЦВК. Пры гэтым дэпутат перакананы, што Святлана Ціханоўская выбары не выйграла.
Гайдукевіч прызнаў, што яго жонка, выкладчык ёгі, праплакала тры дні пасля таго, як убачыла, што рабілася ў краіне пасля 9 жніўня, а некаторыя сябры выйшлі на першы нядзельны марш пратэсту не за апазіцыю, а супраць гвалту.
— І што, гэта ўсё ворагі? Але я супраць таго, каб лёс краіны вырашаўся на вуліцы, — падкрэсліў Гайдукевіч.
Каментары