«Збіралі рэчы ў радзільню, а пасля муж знік». Мінчука затрымалі пад пад'ездам — яго цяжарная жонка засталася адна з пяццю дзецьмі
«Тыя дні, як у тумане», — кажа маці пяці дзяцей Алена Валковіч, якая дагэтуль не можа адысці ад шоку. Яна цяпер цяжарная шостым і хутка павінна ехаць у радзільню. У сераду, 28 кастрычніка, яны з мужам збіралі рэчы ў бальніцу, а праз некалькі хвілін яго затрымалі.
Здарылася гэта ўвечары ў Мінску.
«Мы рыхтаваліся да радзільні, прасавалі дзіцячыя рэчы. Мужу патэлефанавалі, і ён сказаў, што адлучыцца на пяць хвілін, тэрмінова патрэбна дапамога. Мы пераязджалі нядаўна, я падумала, што патрэбна дапамога суседзям у пераносцы рэчаў. На 40 тыдні пра дрэннае не думаецца. І муж выйшаў у хатняй адзежы, майцы з кароткім рукавом. Прайшла гадзіна, дзве, яго тэлефон маўчаў.
Я ўключыла інтэрнэт і жахнулася ад паведамленняў суседзяў. Яны пісалі, што напалі пяць-шэсць чалавек у балаклавах і зацягнулі ў аўтазак некалькі людзей. Я зразумела, што мой муж там, сярод іх», — дзеліцца Алена.
Што адбылося ў той вечар, дакладна невядома. Некаторыя дэталі жанчына даведалася праз адваката. Калі да пад’езда пад’ехалі лукашэнкаўцы ў масках, там стаялі дзяўчына з хлопцам і яе муж Ігар. Ім прапанавалі прайсці ў аўтазак. Ігар пачаў пытацца, за што — і яго ўдарылі па твары. Пасля ўсе пайшлі ў аўтазак.
Мужчыну даставілі ў Маскоўскае РУУС, пасля на Акрэсціна. У пятніцу адбыўся суд. За артыкул 17 (Хуліганства) Ігару далі 13 сутак. Куды яго адправілі пасля суда, Алена не ведае.
«Такі жывёльны страх. Я не спала гэтыя ночы, калі б не дзеці, зусім бы з катушак зляцела… Столькі планаў было. Думалі, як сям’я будзе сустракаць мяне з малой з радзільні. Ігар у аўтапарку дамовіўся ўзяць аўтобус у арэнду, хацеў плакатамі і шарамі ўпрыгожыць.
Цяпер ні таты, ні сустрэчы. Цяжка схавацца і зрабіць выгляд для дзяцей, што ўсё добра».
Па плане Алена вось-вось павінна нарадзіць. Але яна мяркуе, што дачка з’явіцца на свет ужо пасля вяртання мужа.
Шматдзетная маці прызнаецца, што яны аказаліся ў цяжкім становішчы. Сям’я часова застаецца без кармільца, а ў пачатку месяца павінна плаціць па крэдытах. Алена — фатограф, нават на дзявятым месяцы яна ездзіць на здымкі, каб хапіла пакрыць усе расходы.
Цяпер чытаюць
Што вядома пра віцебчука, якога вінавацяць у спробе падрыву самалёта ў Германіі11
Каментары