«Я больш не магу»: загадчыца аддзялення РНПЦ дзіцячай анкалогіі звольнілася, бо не можа нармальна працаваць ад хваляванняў за калег
З РНПЦ дзіцячай анкалогіі, гематалогіі і імуналогіі звольнілася загадчыца анкалагічна-гематалагічнага аддзялення №3 (вядома як аддзяленне для дзяцей старэйшага узросту — ад 7 да 18 год) Надзея Пятроўская.
Стаж яе работы — 21 год. Доктара затрымлівалі на пратэснай акцыі медыкаў 7 лістапада, далі штраф 25 базавых (675 рублёў).
Са слоў самой Надзеі, яна пайшла на звальненне, бо ўжо не магла якасна рабіць сваю работу ад хваляванняў. Пры гэтым, кажа яна, «гэта не палітычны крок», а вымушанае рашэнне.
«Прычына маёй заявы — агульны псіхалагічны фон, сітуацыя ў краіне і ў медыцынскай супольнасці, вечнае адчуванне стрэсу. Можа, гэта я такая крохкая, не даю рады, але мне стала эмацыйна цяжка працаваць якасна і засяроджана.
Працаваць у аддзеле з дзецьмі, хворымі на анкалогію, некаторыя з якіх сыходзяць, гэта і так маральна цяжка, а тут навалілася…
Работа патрабуе вялікай засяроджанасці, а я не магу, і ўсё!
Трасуцца рукі, цякуць слёзы, я не ўпэўнена ў сваіх дзеяннях, баюся прыняць няправільнае рашэнне і, тым самым, нашкодзіць дзеткам больш, чым я нашкоджу ім сваім сыходам.
На мяне вельмі цісне сітуацыя, якая склалася ў краіне і медыцынскай супольнасці, як гэта ўсё выстаўляюць па тэлебачанні, які бруд ліюць. Таму я вырашыла звольніцца», — патлумачыла «Нашай Ніве» Надзея.
Па яе словах, вернецца да прафесіі яна ў іншай палітычнай і псіхалагічнай абстаноўцы, а пакуль упэўнена, што без кавалка хлеба не застанецца, эміграваць не збіраецца.
Надзея кажа, што новая дырэктарка РНПЦ падпісала заяву хутка, утрымаць не спрабавала, пажадала мудрасці — да яе ў Пятроўскай пытанняў няма, крыўдаў таксама. Але яна адзначае, што ранейшы кіраўнік, напэўна, змог бы падтрымаць і знайсці словы для матывацыі да працягу работы.
А замяніць Пятроўскую, па яе словах, пакуль ёсць каму.
Агулам у РНПЦ дзіцячай анкалогіі склалася вельмі напружаная сітуацыя: медыкі адкрыта праяўляюць сімпатыі да пратэстуючых беларусаў і калег. Нядаўна ў РПНЦ, насуперак волі персаналу, змянілася кіраўніцтва, работнікі рыхтуюць адкрыты зварот да грамадства і ўладаў, некаторыя пішуць заявы на звальненні.
Цяпер чытаюць
Адцісканні з татам, урокі з мамай. Як жыве і вучыцца сям’я Севярынцаў у Вільні4
Каментары