Кіраўнік Адміністрацыі прэзідэнта правёў калегію па пытанні «Аб выніках праверкі работ з кіруючымі кадрамі ў дзяржорганах і іншых арганізацыях і мерах па яе ўдасканаленні».
Кіраўнік Адміністрацыі прэзідэнта правёў калегію па пытанні «Аб выніках праверкі работ з кіруючымі кадрамі ў дзяржорганах і іншых арганізацыях і мерах па яе ўдасканаленні», перадае карэспандэнт БЕЛТА.
«Кадравыя рэкамендацыі пішуцца дзеля птушачкі пад капірку, паўтараючы старыя характарыстыкі слова ў слова. Няма за гэтай рэкамендацыяй канкрэтнага чалавека, канкрэтнай асобы», — крытыкаваў Уладзімір Макей, цалкам у духу кадравых нарадаў савецкае пары.
Паводле яго слоў, асобныя кіраўнікі не ўнікаюць у кадравыя пытанні сваёй дзейнасці. Асабліва гэта ўласціва кіраўнікам рэспубліканскіх органаў. Тут відавочны шматлікія выпадкі замоўчвання агрэхаў у кадравай рабоце, падмена сапраўдных прычын вызвалення ад пасады», — наракаў кіраўнік Адміністрацыі прэзідэнта.
Так, у Міністэрстве прамысловасці на працягу 2006‑2008 гадоў 12 кіраўнікоў былі вызвалены ад займаных пасадаў за невыкананне прагнозных паказчыкаў і непрыняцце мер па вываду прадпрыемстваў з крызіснага становішча. У 10 з гэтых 12 выпадкаў фармулёўкі прычын звальнення гучалі як «пагадненне бакоў».
Карціну Макей намаляваў бязрадасную: «амаль усюды выяўлены факты фармалізму, пратэкцыянізму, сямейнасці, ігнаравання нарматыўна-прававой базы». Пра сямейнасць прагучала асабліва моцна.
Макей заклікаў вылучаць на вышэйшыя пасады асобаў, здольных да творчага мыслення.
Варта адзначыць, што за апошнія гады вялікае абмаладжэнне кадраў адбылося на раённым кіраўнічым узроўні, асабліва ў галіне эканомікі. Цікава, што ў апошні час перавагу сталі аддаваць людзям з веданнем замежных моваў. Цяпер Макей спрабуе прасунуць маладзейшыя кадры на нацыянальны ўзровень.
Каментары