Беларускія гісторыкі пра забарону нацыянальнай сімволікі: Не мае ніякага гістарычнага абгрунтавання, вядзе да расколу грамадства
У сувязі з разгортваннем рэжымам Лукашэнкі прапагандысцкай кампаніі па забароне ў Рэспубліцы Беларусь бела-чырвона-белага сцяга мы, беларускія гісторыкі, заяўляем:
Бела-чырвона-белы сцяг з'яўляецца нацыянальным і дзяржаўным беларускім сімвалам. Ён быў ухвалены ў 1917 годзе ўсімі беларускімі нацыянальнымі арганізацыямі і стаў дзяржаўным у 1918 годзе, напрыканцы Першай сусветнай вайны, калі новыя краіны, якія ўзніклі на руінах імперыяў, зацвярджалі свае дзяржаўныя сімвалы. Наша нацыянальная дзяржава Беларуская Народная Рэспубліка прыняла дзяржаўны герб — старажытную Пагоню і дзяржаўны сцяг — бела-чырвона-белага колераў, адпаведных беларускім народным і гістарычным традыцыям.
За мінулае стагоддзе бела-чырвона-белы сцяг стаў духоўным набыткам і маральнай каштоўнасцю для мільёнаў беларусаў незалежна ад іх палітычных поглядаў. У 1930 годзе знакаміты паэт-камуніст Максім Танк напісаў:
Глядзіце ў будучыню смела!
Настаў доўгачаканы час,
Пад сцягам бел-чырвона-белым
Чакае перамога нас.
Выкарыстанне калабарантамі нацыянальных сімвалаў у часы Другой сусветнай вайны было звычайнай справай у Еўропе і не можа весці да іх дыскрэдытацыі. Мы бачым, як дзяржавы з падобным гістарычным досведам, як, напрыклад, Расія, Украіна, Францыя, Літва, Латвія, Харватыя, Нарвегія, Данія ды іншыя шануюць свае нацыянальныя сцягі. У верасні 1991 годзе Вярхоўны Савет БССР зацвердзіў бела-чырвона-белы сцяг дзяржаўным сцягам Рэспублікі Беларусь. У 1994 годзе менавіта пад ім прыносіў прысягу новаабраны прэзідэнт Лукашэнка. Сённяшняя афіцыёзная прапагандысцкая кампанія па дыскрэдытацыі і забароне нацыянальнага і дзяржаўнага сімвала Беларусі — бела-чырвона-белага сцяга — не мае ніякага гістарычнага абгрунтавання, вядзе да расколу грамадства і распальвання варажнечы паміж грамадзянамі Беларусі.
Арганізатары і ўдзельнікі гэтай кампаніі павінны панесці адказнасць не толькі перад судом гісторыі, але і юрыдычную. Заяву ўжо падпісалі:
доктар гістарычных навук Аляксандр Краўцэвіч
доктар гістарычных навук Аляксандр Смалянчук
доктар габілітаваны Тадэвуш Гавін
доктар габілітаваны Юры Гардзееў
доктар гістарычных навук Сяргей Токць
доктар габілітаваны Генадзь Сагановіч
доктар гісторыі Лілія Коўкель
кандыдат гістарычных навук Андрэй Чарнякевіч
кандыдат гістарычных навук Іна Соркіна
кандыдат гістарычных навук Анатоль Вялікі
кандыдат гістарычных навук Кацярына Крывічаніна
кандыдат гістарычных навук Андрэй Кіштымаў
гісторык Андрэй Радаман
кандыдат гістарычных навук Аляксандр Радзюк
кандыдат гістарычных навук Аляксей Шаланда
кандыдат гістарычных навук, дацэнт Вадзім Аніпяркоў
доктар габілітаваны Алег Латышонак
кандыдат гістарычных навук Анатоль Трафімчык
магістр гісторыі Андрэй Мастыка
Каментары