Мінчукоў, якія святкавалі Масленіцу на катэджы пад Маладзечнам, судзілі ў чатырох гарадах
Пад Маладзечнам на катэджным участку 27 лютага затрымалі кампанію мінчукоў, якія прыехалі на адпачынак з нагоды заканчэння зімы. Па інфармацыі МУС, супрацоўнікі АМАП затрымалі 25 чалавек: «Яны збіраліся спаліць на Масленіцу пудзіла ў колерах нацыянальнага сцяга. Іх дзеянням, зафіксаваных на відэа, будзе дадзена крымінальна-прававая ацэнка». Падрабязнасці справы паведамляюць праваабаронцы.
25 чалавек былі дастаўленыя ў Маладзечанскі РАУС, дзе на іх склалі пратаколы за ўдзел у несанкцыянаваным масавым мерапрыемстве па арт. 23.34 КаАП.
Некаторых затрыманых перавезлі ў Валожын, Смалявічы і Барысаў, дзе над імі адбыліся суды.
Праваабаронцы «Вясны» даведаліся пра 13 асуджаных чалавек з той кампаніі.
Мінімум шасцярых чалавек арыштавалі на 15 сутак, сярод іх: Алеся Буйніцкая, Аляксей Крышталь, Руслан Лапшоў, Наталля Шмялёва, а таксама Багдан і Яўгенія Шымановічы. Крышталя арыштаваў суд Барысаўскага раёна.
Самы вялікі штраф атрымала 47-гадовая Ала Роўба. Яна павінна будзе выплаціць 1450 рублёў (50 базавых).
Мар'яне Касаткінай дасталася трохі «менш» — яе асудзілі на 1160 рублёў (40 базавых).
Алена Бледнова, Наталля Ласкутова і Лілія Рагожына былі аштрафаваныя на 725 рублёў (25 базавых).
Суд Валожынскага раёна пакараў Алену Пашковіч на 870 рублёў (30 базавых).
Віталія Глінская пасля суда выйшла на волю са штрафам у 580 рублёў (20 базавых).
Каментары