Ютуб-блогер Мікіта Мелказёраў трапіў у бальніцу пасля таго, як яго збіла машына. Здарылася гэта яшчэ 3 сакавіка.
«Увечары пайшоў у аптэку па таблеткі ад жывата. Заадно, думаю, наматаю кола па раёне — я стаў актыўным маладым чалавекам і выхаджваў па 10 тысяч крокаў на дзень. Пераходзіў дарогу на зялёнае святло, калі мяне збілі. Глядзеў у кірунку вуліцы Ламаносава, а потым бац — і я ўжо гляджу ў кірунку вуліцы Калініна. Машына люксавая, так што ДТЗ было з густам. Я ўпершыню пракаціўся на такой машыне — думаў, што гэта будзе ў крэсле, а аказалася на капоце.
Я як вопытны хіпстэр зразумеў, што першай справай трэба сабраць навушнікі Air Pods, бо гэта першая рэч у маім жыцці, якую я купіў у крэдыт, і толькі нядаўна яго выплаціў. А далей паехалі мы з мужчынам, які мяне збіў, катацца па бальніцах. Зразумела, ён таксама перапужаўся», — распавядае Мікіта.
Блогера завезлі ў бальніцу хуткай медыцынскай дапамогі. Зрабілі МРТ, рэнтген. Аказалася, зламаны адростак шыйнага пазванка і парваная каленная звязка.
«Наклалі таксама некалькі швоў на патыліцы. Мушу адзначыць доктара — ён сканчваў крутыя курсы фастрыгавання і шыцця, бо ў мяне там амаль нічога не заўважна, — жартуе Мікіта. —
Застаўся на тыдзень у бальніцы. Знайшліся таблеткі, па якія я ішоў. Мяне паклалі ў палату на 6 чалавек. Пацаны ўсе па-рознаму храпелі, чатыры танальнасці, і мне трэба было ўслухацца ў адну і заснуць. Але нешта не атрымлівалася. Злева ад мяне базіраваўся Алежка, цікавы мужчына. Да яго прыходзіў доктар, пытаўся: ты разумееш, дзе ты знаходзішся? Алег весела правёў час і апынуўся ў бальніцы, у яго былі пашкоджаны абедзве канцавіны. Але ён быў яшчэ п’яны настолькі, што на іх скакаў у туалет. Карацей, літаратура чыстай вады.
Цяпер у мяне каўнер, у якім я падобны да Уільяма Шэкспіра на яго лепшым партрэце, і прыгожы спартовы артэз (дагэтуль быў накладзены гіпс — «НН»), я наблізіўся да прафесійных футбалістаў хаця б па гэтай частцы. Скончыўся першы з васьмі тыдняў, якія мне трэба праходзіць у артэзе. «Шэкспіра» свайго я здымаю перыядычна, але з ім трэба правесці месяц ці больш».
ДАІ вядзе праверку па факце здарэння. Кіроўца, кажа Мікіта, аказаўся нармальным мужчынам, цікавіўся яго здароўем. Журналіст паступова вяртаецца ў працоўны рытм, запісвае новыя выпускі для канала.
«Гэта тактыка, каб з глузду не з’ехаць дома. Бо тут я ўжо ўсё бачыў, пакрыху стараюся рухацца. Цяпер надвор’е не вельмі, таму я не магу касплэіць дзядоў і выходзіць да пад’езду. А так я спрабаваў — садзіўся на лаўку, арандаваныя французскія мыліцы паважна клаў побач з сабой і асуджальна на ўсіх глядзеў».
Чытайце таксама. Самы папулярны ютуб-блогер Беларусі Мікіта Мелказёраў шчыра пра адмову ад алкаголю, знаёмствы ў інтэрнэце і журналістыку
Цяпер чытаюць
За выбух у мінскім метро судзілі не толькі Канавалава і Кавалёва. Як склаўся лёс яшчэ трох фігурантаў справы?7
Каментары