У Кобрыне асудзілі жанчын за ўпрыгожванне парку напярэдадні Дня Волі
У Кобрыне 26 сакавіка асудзілі чацвярых жанчын за ўпрыгожванне гарадскога парку імя Аляксандра Суворава напярэдадні Дня Волі, перадае «Новы Час».
Суддзя Вадзім Здановіч пакараў 7 суткамі арышту доктарку-педыятра Юлію Рафаловіч, штрафам у 10 базавых велічынь — пенсіянерак Людмілу Белавусаву, Вольгу Алексіюк і Іну Суджум.
Усе яны пасля затрымання аб’явілі галадоўку. З моманту зняволення да абеду 26 сакавіка кобрынкі знаходзіліся ў ізалятары часовага ўтрымання мясцовага РАУС. Шматдзетную маці Марыну Жук, якую пасля затрымання вызвалілі, будуць судзіць пазней.
Марына Жук
Супрацоўнікі крымінальнага вышуку Кобрынскага РАУС Уладзіслаў Світыч і Уладзіслаў Кабарыха затрымалі жанчын 24 сакавіка пасля 23 гадзіны падчас шпацыру ў парку. Грамадзянкам інкрымінавалі распаўсюд бел-чырвона-белых стужак і ўлётак з заклікам «Кобрын, выходзь! Беларусь будзе вольнай!», а таксама фатаграфаванне гэтых улётак. Разам з тым, міліцыянты канфіскавалі ў затрыманых пакет папяровых цыліндраў белага колеру з чырвонай паласой.
Свае дзеянні жанчыны матывавалі жаданнем упрыгожыць парк напярэдадні Дня Волі. Прычым Юлія Рафаловіч звярнула ўвагу суда на тое, што іх затрымлівалі супрацоўнікі РАУС у цывільным, якія не назваліся, а таксама на тое, што ўмовы ўтрымання ў ІЧУ прыніжаюць чалавечую годнасць. Пасля агалошвання прысуду спадарыня Юлія напісала заяву на адтэрміноўку адміністрацыйнага арышту ў сувязі са службовай неабходнасцю, аднак Вадзім Здановіч не задаволіў заяву доктаркі.
Каля 20 чалавек прыйшло да будынка Кобрынскага раённага суда, каб падтрымаць сваіх зямлячак.
Цяпер чытаюць
Зорная беларуская інтэлектуалка пайшла на рэаліці ад ТНТ — будзе плясці інтрыгі, каб атрымаць 100 тысяч еўра6
Каментары