Жыхарку Віцебска асудзілі на 20 сутак за тое, што прыйшла на парад 9 мая ў бел-чырвона-белай масцы
Суд Чыгуначнага раёна Віцебска разгледзеў адміністрацыйную справу 19-гадовай Ангеліны Туравец, яе затрымалі 9 мая каля плошчы Перамогі. Дзяўчыну забралі за тое, што назірала за афіцыйным парадам з бел-чырвона-белай усмешкай на масцы. Міліцыя ўспрыняла гэта як несанкцыянаванае пікетаванне (арт. 24.23 КаАП), паведамляюць правабаронцы.
Ангеліну затрымалі разам з 18-гадовым Русланам Яневічам, але хлопца пазней адпусцілі.
У Чыгуначным РАУС на яе склалі пратакол паводле ч.3 арт. 24.23 КаАП і змясцілі ў ізалятар часовага ўтрымання, дзе яна і прабыла трое сутак да суда. Арыштаваныя два тэлефоны дзяўчыны. Судовае пасяджэнне прайшло сёння з выкарыстаннем Skype. Справу разбірала суддзя Алена Цыганкова.
Паводле міліцэйскага пратакола, Ангеліна Туравец 9 мая, знаходзячыся каля дому 24 на вул. Калініна, мела на твары маску чорнага колеру з бел-чырвона-белай выявай на ёй «для публічнай дэманстрацыі» — і гэткім чынам правяла адзіночнае пікетаванне з мэтай выказвання сваіх грамадска-палітычных інтарэсаў.
Дзяўчына не згадзілася з пратаколам і сваёй віны не прызнала. Патлумачыла на судзе, што проста прыйшла паглядзець на парад Перамогі ў цэнтры Віцебску, бо штогод разам з бацькам адзначае свята менавіта такім чынам. Сцвердзіла, што ў чорнай масцы з выявай усмешкі («белыя зубы — чырвоны язык») ходзіць яшчэ са снежня 2020 года.
«Прысутнічала ў ёй на судах, была ў ёй у следчым камітэце, не здымала гэтую маску, калі размаўляла з начальнікам Віцебскага РАУС 25 сакавіка — і ніхто мне не рабіў наконт яе ніякіх заўваг, не папярэджваў і не рэкамендаваў перастаць яе насіць», — запэўніла на судзе Ангеліна Туравец. Падкрэсліла, што не мае іншай маскі.
Адвакатка прасіла вярнуць справу на дапрацоўку, бо было шмат недакладнасцяў — напрыклад з часам затрымання. Выявілася таксама, што Ангеліну не азнаёмілі з пратаколам затрымання. Але гэтую просьбу суддзя Алена Цыганкова адхіліла.
На думку суддзі, віна Туравец «знайшла сваё пацверджанне». Алена Цыганкова пастанавіла пакараць Ангеліну Туравец за ўдзел у несанкцыянаваным пікетаванні (ч.3 арт. 24.23 КаАП) адміністрацыйным арыштам на 20 сутак.
Да гэтага Ангеліну Туравец ужо 4 разы прыцягвалі да адказнасці за парушэнне заканадаўства аб масавых мерапрыемствах. Яе каралі штрафамі і арыштамі. У лютым 2021 году ў дачыненні маці Ангеліны Таццяны Туравец была заведзеная крымінальная справа за ўжыванне гвалту да супрацоўнікаў МУС (арт. 364 КК), якая разглядаецца цяпер судом Віцебскага раёна.
Цяпер чытаюць
Як у галечы співалася радня Лукашэнкі? Малавядомыя факты23
Каментары