Фрэнсісу Бухгольцу быў 71 год. Як паведамілі члены яго сям’і 22 студзеня ў сацыяльных сетках, ён доўгі час змагаўся з анкалагічным захворваннем, якое і стала прычынай смерці.
Фрэнсіс Бухгольц нарадзіўся 19 лютага 1954 года ў Гановеры і быў адным з ключавых удзельнікаў Scorpions у перыяд найбольшага росквіту гурта — з 1973 па 1992 год. За гэты час ён удзельнічаў у запісе дзесяці студыйных альбомаў, у тым ліку такіх знакавых, як Lovedrive, Blackout, Love at First Sting і Crazy World. Менавіта тады з’явіліся хіты, што прынеслі гурту сусветную славу.
Дакладныя прычыны сыходу Фрэнсіса Бухгольца з калектыву пасля выхаду Crazy World застаюцца невядомымі. Сярод магчымых версій называюць як жаданне больш часу прысвяціць сям’і, так і фінансавае рознагалоссе.
Нягледзячы на развітанне са Scorpions, Бухгольц не пакінуў музыку: ён час ад часу выходзіў на сцэну, супрацоўнічаў з былымі калегамі і ўдзельнічаў у канцэртных турах і запісах іншых праектаў, у тым ліку калектыву Temple of Rock.
Гурт Scorpions, заснаваны ў 1965 годзе, стаў адным з самых паспяховых у гісторыі рок-музыкі, прадаўшы больш за 100 мільёнаў альбомаў і выступіўшы з тысячамі канцэртаў па ўсім свеце. Асаблівую вядомасць ва Усходняй Еўропе атрымала іх песня Wind of Change, якая стала сімвалам эпохі перамен.
Каментары