«135 дзён фінансавай праверкі. Чыстыя! Адбіліся!» ДФР не знайшоў парушэнняў у брэсцкім тэатры «Крылы Халопа»
Кіраўнік брэсцкай прасторы «Крылы Халопа» Аксана Гайко паведаміла, што забрала дакументы і камп'ютар з Дэпартамента фінансавых расследаванняў Камітэта дзяржкантролю.
«135 дзён фінансавай праверкі. Чыстыя! Адбіліся!», — напісала Гайко ў сацыяльных сетках.
27 студзеня гэтага года ДФР прыйшоў у прастору «Крылы Халопа», якую адкрыў аднайменны тэатр. Перад гэтым інспектары дэпартамента правялі аналагічнае мерапрыемства дома ў Гайко.
Як патлумачыла Аксана, увесь гэты час праходзіла фінансавая праверка.
«Прычым ва ўсіх бакоў — самой прасторы, ІП, мяне як фізічнай асобы. Таксама была праверка МНС. Усе гэтыя праверкі мы прайшлі».
Але рахункі па-ранейшаму арыштаваныя. 18 чэрвеня Генпракуратура прыняла рашэнне ліквідаваць «Крылы Халопа» за дзейнасць, якая «не адпавядае мэтам і прадмету, заяўленым у статуце».
У прыватнасці, як сцвярджала пракуратура, са жніўня 2020 года «Тэатр Крылы Халопа» «арганізоўваў выставы прац і мастацкія прэзентацыі твораў, якія былі накіраваныя на фарміраванне ў грамадзян станоўчага стаўлення да здзяйснення супрацьпраўных дзеянняў».
«Што будзем рабіць, пакуль сказаць цяжка. На гэтым этапе адказваем на запыты ўсіх магчымых інстанцый з нагоды ліквідацыі», — кажа Аксана Гайко.
Цяпер чытаюць
Кобрынца, які застаўся без нагі пасля выбуху машыны, пасадзілі за кантакт з журналістамі. Пасля вызвалення ён расказаў сваю гісторыю1
Каментары