«Беларусьнафту» вывелі з «Белнафтахіма», каб пазбегнуць санкцый. І што, дапаможа?
Канцэрн «Белнафтахім», у які ўваходзіць шэраг прадпрыемстваў, сярод якіх да нядаўняга часу была і «Беларусьнафта», трапіў пад санкцыі ЕС і ЗША. 17 ліпеня Указам Лукашэнкі «Беларуснафта» была выведзена з падпарадкавання канцэрну.
Апроч таго, што «Беларуснафта» кантралюе да двух трацін АЗС у Беларусі, у кампаніі ёсць адна вялікая справа з Еўропай — «Беларуснафта» экспартуе 1,6 мільён тон беларускай нафты, якую здабываюць у Гомельскай вобласці, на НПЗ «Раснафты» ў Германіі.
Такім чынам, фінтом з вывадам з шэрагаў канцэрну, рэжым спадзяецца, што пастаўкі ў Германію і разлікі па іх працягнуцца. Але ці дапаможа? Мы спыталіся пра гэта ў двух банкіраў, якія пракаментавалі сітуацыю.
«Канцэрн «Белнафтахім» — гэта ўсяго толькі кіруючая кампанія, а «Беларуснафта» гэта аснобны РУП, са сваёй маёмасцю і кіраўніцтвам. Таму, па фармальнай прыкмеце, пасля гэтага фінта «Беларуснафта» пад санкцыямі не будзе», — сказала «Нашай Ніве» абазнаная крыніца.
Другі эксперт дадае, што хаця фармальна «Беларуснафта» і выйдзе з-пад санкцый, вырашэнне праблемы шматпавярховае.
«Усё будзе залежаць ад чалавека, які афармляе плацёж. Напрыклад, у Deutsche Bank сядзіць умоўны аператар Ганс, бачыць дзіўнаватую дзяржаўную кампанію, на якую трэба перавесці грошы. Ганс учора чытаў у газеце, што з Беларуссю нешта незразумелае робіцца, у яго нараджаюцца сумневы.
Пры гэтым, для «Беларуснафты» цана пытання — гэта сума перавода, а для Ганса і, шырэй, для Deutsche Bank — гэта камісія з сумы. Гэта дробязь, груба кажучы, для нямецкага банка.
Але калі ён дапусціць «забароненую» транзакцыю, то банку гэта можа каштаваць несувымерна больш, чым ён заробіць на камісіі.
Таму Ганс, хутчэй за ўсё, атрымае інструкцыю, і сам будзе так думаць, што яму прасцей проста гэтую плацёжку адфутболіць, чым губляць час і разбірацца, пад санкцыямі яны там ужо, ці не пад санкцыямі.
Праўда, у гэты момант у гісторыі павінен з’явіцца фінансавы дырэктар «Беларуснафты», які пакажа яму паперы, што па фармальнай прыкмеце ўмоўны Deutsche Bank ужо можа пераводзіць грошы. І вось як вырашыцца гэтая сітуацыя: Ганс проста кладзе трубку або кажа «Дашліце мне паперы, я падумаю», будзе залежаць ад банка і ад выканаўцы», — кажа банкір.
Цяпер чытаюць
За забойства чалавека ў ІЧУ Барысава арыштавалі двух зэкаў-рэцыдывістаў і 26‑гадовага міліцыянера Кляшчонка1
Каментары