У Кракаве афіцыйна зарэгістравалі Асацыяцыю беларускіх выдаўцоў — першую прафесійную арганізацыю, якая аб'ядноўвае беларускіх выдаўцоў незалежна ад таго, дзе яны цяпер працуюць.
Ідэя заснавання арганізацыі была аформленая яшчэ ў лістападзе 2025 года падчас фестывалю інтэлектуальнай кнігі Pradmova ў Варшаве. Тады адзінаццаць прадстаўнікоў выдавецкай сферы падпісалі дэкларацыю аб супрацоўніцтве і выказалі гатоўнасць стварыць агульную прафесійную структуру. Праз некалькі месяцаў гэтая задумка атрымала юрыдычнае ўвасабленне ў Польшчы.
Стваральнікі Асацыяцыі адзначаюць, што яе з'яўленне непасрэдна звязана з тымі ўмовамі, у якіх сёння існуе беларускае кнігавыданне. Унутры Беларусі незалежныя выдавецтвы і культурныя арганізацыі сутыкнуліся з сур'ёзнымі абмежаваннямі, многія былі ліквідаваныя або пазбаўленыя магчымасці паўнавартасна працаваць. У выніку значная частка беларускага кніжнага сектара перамясцілася за межы краіны. Паводле ацэнак заснавальнікаў, сёння за мяжой дзейнічае больш за два дзясяткі беларускіх выдавецтваў, прычым найбольшая іх колькасць працуе ў Польшчы.
Новая арганізацыя закліканая дапамагчы гэтым выдавецтвам дзейнічаць больш зладжана. Яна будзе займацца каардынацыяй супольных праектаў, прадстаўленнем інтарэсаў беларускіх выдаўцоў, развіццём міжнародных кантактаў і пошукам новых магчымасцяў для супрацоўніцтва. Важнай задачай таксама называецца прадстаўленне беларускага кніжнага сектара на міжнароднай арэне як адзінай прафесійнай супольнасці.
Кіраўніком Асацыяцыі абраная Валянціна Барбара Андрэева. Намеснікам старшыні стаў Ілля Андрэеў.
Сярод найбліжэйшых планаў арганізацыі — правядзенне агульнага сходу, на якім будзе вызначаны парадак прыняцця новых сябраў. Таксама плануецца распрацоўка этычнага кодэкса беларускага выдаўца і пашырэнне ўдзелу беларускай кнігі ў культурных мерапрыемствах беларускай дыяспары ў розных краінах.
Асацыяцыя таксама заявіла пра адкрытасць да супрацоўніцтва з замежнымі выдавецкімі арганізацыямі, культурнымі ўстановамі, кніжнымі кірмашамі і ўсімі, хто падтрымлівае прынцыпы свабоднага слова і незалежнай культуры.
Ціханоўская наведала беларускі стэнд на Міжнародным кніжным кірмашы ў Варшаве
Выданне «Руіны Беларусі» прызналі адной з найпрыгажэйшых польскіх кніг
Чатырнаццаць выдавецтваў, каля паўтысячы кніг… Заснавальнікі новай варшаўскай кнігарні Kamunikat.shop расказалі пра далейшыя планы
Бяляцкі: «Трэба выдаваць кнігі на беларускай мове. Па-руску кнігі трэба выдаваць у Расіі». Фядута абурыўся
Цяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5959
Каментары