«…Вам надакучыла падыходзіць ранкам да паліцы і бачыць на ёй ўсялякія-розныя шкарпэткі, з якіх у ніводнай няма пары?Вам абрыдла, усё ж пайшоўшы на гешэфт з сумленнем ды нацягнуўшы чорную і чырвоную, мармытаць у гасцях нешта кшталту: «У вас такая ўтульная вітальня, можна, я лепей пастаю тут?» … І Вам, амаль выпхнутаму ў гасцёўню, абрыдла гістэрычна крычаць гаспадарам: «Паглядзіце ў вакно, паглядзіце ў вакно — там лятаючы Памідораў!», каб тымчасам ліхаманкава скінуць боты і хуткастрэльна ўплішчыцца ў першыя-лепшыя тапкі 23-га памеру?...
Зазірнула сонца і ў Ваша аконца! Мы прапануем Вам рэвалюцыйны прадукт, які прынясе Вам душэўны спакой: гэта абсалютна фантастычны, унікальны
набор «Аднолькавыя шкарпэткі»©!
У гэтым цалкам неверагодным наборы Вы знойдзеце ідэнтычныя, тоесныя, тыя самыя, -Божачкі, называйце як хочаце! — адным словам, дзве абсалютна аднолькавыя шкарпэткі. Толькі падумайце: два шкарпэткавыя асобнікі, якія адмыслова для Вас вынайшлі найвядомыя навукоўцы, выкарыстоўваючы найноўшыя фарбавальныя і вымяральныя тэхналогіі, якія аніхто не адрозніць ні па колеры, ні па памеры.
Спажывец: «Незямная асалода! Вядома, я і раней падазраваў, што насіць шкарпэткі - кайф: яны так прыемна аблягаюць ногу, у іх гэтак утульна. Але з цягам часу высветліў, што не ўсе шкарпэткі аднолькавыя. Рэч у тым, што я — піяніст і ў мяне няма часу глядзець за нагамі. (Бягучы подпіс: Леапольд Швагер, піяніст). Не так даўно, выступаючы перад публікай, пачаў заўважаць, што жанчыны адварочваюць ад мяне позірк і нават пасміхаюцца. Я не мог зразумець, у чым праблема: прарэх зашпілены, парэзаў ад галення няма. Я пазбыўся сну, пачаў зазіраць у бутэльку. Пакуль аднойчы сябар не параіў набыць набор «Аднолькавыя шкарпэткі»©. Маё жыццё цудоўна перамянілася: жанчыны на канцэртах зноў пазіраюць у мой бок, а да мяне вярнулася ўпэўненасць. Не паверыце: я нават дазваляю сабе цяпер рэзацца пры галенні і не зашпільваць прарэх. Мала таго: часцяком апранаю пад фрак шорты».
Мужчына ў белым халаце з прабіркай у руцэ на тле хімічнай лабараторыі: «Мы правялі сацыялагічныя апытанне 5 тысяч чалавек і 5 тысяч шымпанзэ ва ўсім свеце, і ніхто з іх не адрозніў двух асобнікаў з набору «Аднолкавыя шкарпэткі»©. Ніводная жывая істота! 100-працэнтны вынік. Гэта фантастыка! Я, як сацыёлаг і ўладальнік дзьвюх дарослых ног, раю выкарыстоўваць у якасці шкарпэтак толькі набор «Аднолькавыя шкарпэткі»©!
Голас за кадрам: «І гэта яшчэ не ўсё! Акрамя двух шкарпэткавых асобнікаў на любы памер і колер абсалютна задарма мы вышлем на Ваш адрас глянцаваную кардонку, якую прыемна разрываць, калі Вам захочацца ўпершыню атрымаць асалоду ад Вашага набора «Аднолькавыя шкарпэткі»©. Адваротны бок тае кардонкі можна выкарыстаць таксама ў якасці кардонкі-для-напісання-чаго-небудзь-на-ёй. І гэта яшчэ не ўсё: Мы дашлём Вам стопрацэнтовую капронавую нітку, якая злучае два шкарпэткавыя асобнікі разам….
…І нават гэта яшчэ ня ўсё! Калі Вам захочацца чагосьці нязведанага, Вы можаце абсалютна лёгка і хутка памяняць шкарпэткі з нагі на нагу, бо нашыя шкарпэткавыя асобнікі выштукаваныя цалкам узаемазамяняльнымі і дасканала прымаюць форму любога ступака, на які насоўваюцца».
Мужчына ў гавайскай кашулі: «Здурнець можна!»
Спажыўчыха: «Раней мой муж з жахам чакаў канца прання, каб зноў не далічыцца некалькіх сваіх упадабанак. Але цяпер, калі я набыла 50 выдатных набораў «Аднолькавыя шкарпэткі»©, муж больш не турбуецца: хай сабе колькі знікла ў чэраве машыны -- усё адно маем яшчэ шмат абсалютна аднолькавых асобнікаў. Цяпер назіраць за машынным праннем зрабілася для мужа асалодай: на 20-годдзе шлюбу ён нават падарыў мне стартэр».
Голас за кадрам: «Дасылайце на наш адрас усяго-толькі 50 у.а. і мы адымчым вам на дом фантастычны набор «Аднолькавыя шкарпэткі»© +шматмэтавую кардонку +100-працэнтную капронавую нітку. І ў дадатак: абсалютна дармавы каталог нашых тавараў, сярод якіх:
Электрычны чайнік, які ПРАЦУЕ
Набор сталовага посуду, які ЧЫСТЫ
і хіт сезону: аўтамабіль, які ЁСЦЬ (абсалютна любой маркі!).
Павал Касцюкевіч
Глядзі яшчэ:
10 запаветаў рэкламніка (паводле Андрэя Гнёта).
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень5
Каментары