Мінскі чыноўнік атрымаў тры гады калоніі за ўдзел у самых масавых жнівеньскіх акцыях і за абразу Лукашэнкі
У судзе Ленінскага раёна Мінска прайшоў разгляд крымінальнай справы супраць начальніка фінансавага аддзела адміністрацыі Ленінскага раёна Юрыя Сянькова, паведамляюць праваабаронцы.
Яго абвінавацілі па двух артыкулах Крымінальнага кодэкса: па артыкуле 342 КК (Удзел у групавых дзеяннях, якія груба парушаюць грамадскі парадак) — за ўдзел у акцыях пратэсту 16 і 23 жніўня 2020 года і па артыкуле 368 КК (Абраза прэзідэнта) — за рэпост у тэлеграме. Мужчына атрымаў тры гады калоніі агульнага рэжыму. Справу разглядала суддзя Таццяна Шоцік, бок дзяржабвінавачвання прадстаўляла пракурорка Юлія Даўгала.
Юрыя Сянькова затрымалі 30 красавіка. Яго пяць разоў асудзілі па адміністрацыйных справах, у выніку чаго ён атрымаў 50 сутак арышту. Затым яго перавялі ў СІЗА ўжо па крымінальнай справе.
Паводле абвінавачвання, Юрый Сянькоў браў актыўны ўдзел у масавых мерапрыемствах у Мінску 16 і 23 жніўня.
Акрамя таго, «Мінсктранс» падаў пазоў аб кампенсацыі матэрыяльнай шкоды ад прастою транспарту ў тыя дні ў памеры амаль 10 000 рублёў.
«Гэта не тое, чаго я заслугоўваю. Я люблю сваю краіну, я не парушыў ніводнага яе закона да 2020 года. Я за 50 дзён на Акрэсціна, больш 50 на Жодзіне і ў СІЗА не дапусціў ніводнага найдробнага парушэння. Я не адмаўляю сваю віну, але я не заслугоўваю ізаляцыі ад грамадства. Я хачу быць карысным яму. Я хачу быць карысным бацькам, мужам, братам. Я хачу працаваць на карысць сваёй краіны. Я прашу не караць мяне менавіта ізаляцыяй і вынесці іншае рашэнне», — сказаў ён.
25 жніўня суддзя Таццяна Шоцік вынесла менавіта такі прысуд, які запатрабавала пракурорка: тры гады пазбаўлення волі ў калоніі агульнага рэжыму. Пазоў «Мінсктранса» вынеслі ў асобнае справаводства.
Каментары