Французскі альпініст, які восем гадоў таму знайшоў на Манблане скрынку са смарагдамі, сапфірамі і рубінамі, цяпер атрымаў палову каштоўнасцяў, піша Бі-бі-сі.
Альпініст, яго імя не называецца, знайшоў металічную скрынку на ледніку на гары Манблан у 2013 годзе. На пакеціках з каштоўнасцямі можна было прачытаць надпіс «Зроблена ў Індыі», таму французскія ўлады меркавалі, што яны належалі камусьці з пасажыраў індыйскага лайнера, які разбіўся на Манблане больш чым паўстагоддзя таму.
Альпініст сумленна, як належыць па французскіх законах, аднёс знаходку ў паліцыю і да гэтага часу чакаў, ці знойдуцца сваякі ўладальніка каштоўнасцяў.
Але яны не знайшліся, і цяпер, па прашэсці васьмі гадоў, улады камуны Шамані, дзе знаходзіцца Манблан, згодна з законам, падзялілі з альпіністам каштоўнасці напалову. Кожная палова каштуе прыкладна 150 тысяч еўра. Мэр Шамані Эрык Фурнье, распавёўшы пра гэта агенцтву Франс-Прэс, яшчэ раз пахваліў альпініста за законапаслухмянасць.
На Манблане ў мінулым стагоддзі разбіліся два індыйскія лайнеры. У крушэнні ў 1950 годзе загінулі 48 чалавек, у крушэнні 1966 года — 117 чалавек.
Французскія ўлады мяркуюць, што каштоўнасці вёз з сабой пасажыр другога лайнера, які ляцеў з Бамбея (цяпер Мумбаі) у Нью-Ёрк.
Пасля тых двух крушэнняў альпіністы многія гады час ад часу знаходзілі на Манблане рэшткі багажу і чалавечыя парэшткі.
У 2012 годзе на схілах гары быў знойдзены мяшок з дыпламатычнай поштай з Індыі. У ім былі газеты 1966 года, календары і прыватны ліст.
У авіякатастрофе 1966 года загінуў сярод іншых бацька індыйскай ядзернай праграмы Хамі Джэхангір Баба.
Цяпер чытаюць
Хто забараняе ў Беларусі кнігі — вось гэтыя 22 чалавекі14
Хто забараняе ў Беларусі кнігі — вось гэтыя 22 чалавекі
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары