У Карэі памілавалі экс-прэзідэнтку, асуджаную на 20 гадоў за карупцыю. Там гэта ўжо амаль традыцыя
Пак Кын Хе, якая была прэзідэнткай Карэйскай Рэспублікі у 2013—2017 гадах, памілаваная карэйскімі ўладамі. У зняволенні яна была з сакавіка 2017-га.
Лёс Пак Кын Хе для большасці іншых краін быў бы паказальным і павучальным. Але для яе радзімы ён хутчэй тыповы. Паўднёвая Карэя адметная тым, што там мала які прэзідэнт не падвяргаўся пасля заканчэння сваіх паўнамоцтваў крымінальнаму пераследу за карупцыю.
У сярэдзіне 1990-х на лаве падсудных за карупцыю і хабарніцтва апынуліся адразу два былыя прэзідэнты — Чон Ду Хван (1980—1988) і Ро Дэ У (1988—1993). Акрамя карупцыі, іх яшчэ абвінавацілі ва ўзброеным захопе ўлады і задушэнні пратэстаў. За гэта Чон Ду Хван спачатку быў прысуджаны да смяротнага пакарання, а Ро Дэ У — да 23 гадоў зняволення. Але ўрэшце яны, можна сказаць, абышліся лёгкім перапудам, бо неўзабаве тэрміны ім памянялі на больш мяккія, а ў 1998 годзе ўвогуле амніставалі.
Наступныя два прэзідэнты, Кім Ён Сам і Кім Дэ Чжун, у турмы пасля прэзідэнцтва не трапілі, хоць абвінавачванні ў карупцыі не мінулі і іх. Сын Кім Ён Сама нават быў на некалькі гадоў асуджаны. Пазбег суда ды зняволення і наступны прэзідэнт, Но Му Хён (2003—2008), але толькі таму, што ў 2009 годзе, калі яго збіраліся арыштоўваць, скончыў жыццё самагубствам, саскочыўшы з высокай скалы.
А вось наступнік Но Му Хёна і папярэднік памілаванай Пак Кын Хе, Лі Мён Бак (2008-2013) у 2018 годзе быў арыштаваны і асуджаны на 17 гадоў зняволення за хабарніцтва, растраты і злоўжыванне ўладай. І цяпер зноў сядзіць, хоць раней на паўтара года быў вызвалены па стане здароўя.
Такім чынам, шлях з прэзідэнцкага палаца ў турму для Паўднёвай Карэі стаў ужо амаль традыцыйным.
За апошнія 40 гадоў з сямі былых прэзідэнтаў Паўднёвай Карэі апынуліся за кратамі чатыры, а адзін скончыў жыццё самагубствам.
Праўда, прысуджаныя ім страшныя судовыя тэрміны на справе, як правіла, аказваюцца больш сімвалічнымі, бо пакуль што ніхто не адседжваў нават траціны.
Цяпер чытаюць
Доктарка, якая вучылася па мэтавым накіраванні, адпрацавала паўтара года з пяці — і пераехала ў Польшчу15
Доктарка, якая вучылася па мэтавым накіраванні, адпрацавала паўтара года з пяці — і пераехала ў Польшчу
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ3131
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ31
Ці патрэбная беларуская мова тым, хто размаўляе па-руску? Азаронак задаўся такім пытаннем на СТБ, а выпускнік Акадэміі МУС прапанаваў замяніць урокі факультатывамі4848
Каментары