Сямейную пару з Гродна пакаралі за ўдзел у вераснёўскім маршы 2020 года вялікімі тэрмінамі. Жанчына — дачка вядомага адэпта Лукашэнкі
У судзе Гродна вынесены прысуд па крымінальнай справе ў дачыненні да юрысткі Алены Ягорычавай і слесара Ігара Пазнякова. Палітвязняў абвінавачвалі ў дзеяннях, якія груба парушаюць грамадскі парадак (ч.1 арт. 342 КК) і гвалце альбо пагрозе прымянення гвалту ў дачыненні да супрацоўніка органаў унутраных спраў (арт. 364 КК), піша «Вясна».
Паводле абвінавачвання, муж і жонка ўдзельнічалі ў маршы 6 верасня 2020 года, дзе, «натхняючы сваімі паводзінамі іншых, станавіліся ў «счэпку», дэманструючы свой намер аказваць відавочнае непадпарадкаванне супрацоўнікам міліцыі».
Алену таксама абвінавачвалі ў гвалце ў дачыненні да амапаўца — нібыта яна «нанесла не менш за адзін удар у вобласць твару і шыі, пасля чаго ажыццявіла захоп правай рукой за маску і шыю пацярпелага, прычыніўшы яму фізічны боль і пабоі».
Суддзя Віталь Лабоцкі прысудзіў Ігару 2,5 года «хіміі», а Алене — 2,5 года калоніі.
Незвычайнае ў гэтай, на жаль, нібыта самай звычайнай па сённяшнім часе справе тое, што бацька Алены — Уладзімір Ягорычаў. Ён гісторык, выкладчык Гродзенскага дзяржаўнага ўніверсітэта, але найбольш вядомы не толькі ў Гродне, але і ва ўсёй Беларусі як апалагет Сталіна і прыхільнік Лукашэнкі.
У 2014 годзе менавіта Уладзімір Ягорычаў разам з калегам па ўніверсітэце Вадзімам Хілютам праводзіў экспертызу «на экстрэмізм» кнігі праваабаронца Алеся Бяляцкага «Асвечаныя Беларушчынай». Тады ў заключэнні Ягорычаў і Хілюта адзначылі, што кніга Бяляцкага можа нанесці шкоду Рэспубліцы Беларусь альбо краінам-членам Мытнага саюза.
Каментары