Беларусы Беласточчыны здолелі адстаяць беларускамоўны дзіцячы садок. Улады хацелі аб'яднаць яго са школай
Дзіцячы садок і школу з беларускай мовай навучання ў Беластоку не будуць аб’ядноўваць. 16 лютага пра гэта паведамілі мясцовыя ўлады падчас адмысловай прэс-канферэнцыі, піша сайт mostmedia.io. Гэтыя планы выклікалі сур'ёзны непакой у мясцовай беларускай дыяспары, бо яны лічылі, што вынікам стане змяншэнне ў аб'яднанай установе колькасці беларускай мовы.
На прэс-канферэнцыі прэзідэнт Беластока Тадэвуш Трускаляскі заявіў, што горад адмовіўся першапачатковых планаў аб’яднання беларускамоўнага дзіцячага садка №14 і пачатковай школы №4. Гэта стала вынікам пратэсту беларускай меншасці і далейшых перамоў з мясцовай уладай.
Трускаляскі адзначыў, што беларуская супольнасць няправільна інтэрпрэтавала факты. Улады хацелі аб’яднаць установы, а не ліквідаваць адну з іх. Прэзідэнт Беластока падкрэсліў, што да тэмы аб’яднання ўсё роўна можна будзе вярнуцца, але невядома, праз які прамежак часу.
Тадэвуш Трускаляскі адзначыў, што з-за адмены аб’яднання не атрымаецца сэканоміць бюджэтныя сродкі. На падтрыманне абедзвюх устаноў ідзе штогод каля 300 тысяч злотых.
Сутнасць канфлікту была ў тым, што беларускі садок №14 — установа, у якой беларуская мова — не дадатковая мова выкладання, а базавая. Улады Беластока вырашылі аб’яднаць яго з пачатковай школай №4, дзе таксама беларуская мова вывучае часткай дзяцей, але ўжо як дадатковая.
У бацькоў і дыяспары гэтыя планы выклікалі занепакоенасць. Была запушчаная петыцыя ў абарону садка, якую падпісалі амаль 700 чалавек. Выступілі супраць аб'яднання навучальных устаноў і беларускія арганізацыі рэгіёна.
Асноўную сутнасць прэтэнзій і засцярог беларусаў Падляшша нядаўна папулярна выклаў у Фэйсбуку адзін з вядомых дзеячаў мясцовай беларускай супольнасці, стваральнік сайта kamunikat.org Яраслаў Іванюк:
«Чаму супраць гэтага пратэстуюць беларускія арганізацыі? Справа ў тым, што цяпер дзіцячы садок (прадшколле) гэта ўстанова з польскай і беларускай мовамі навучання. У школе — толькі ахвотныя дадаткова могуць вывучаць беларускую мову. Аб’яднанне іх у адзін комплекс пагражае тым, што таксама і ў прадшколлі беларуская мова будзе толькі дадатковай і для ахвотных».
Паколькі ў Польшчы ад грамадскай думкі немагчыма проста адмахнуцца, як гэта робіцца ў Беларусі, то ўлады мусілі прымаць пад увагу голас беларускай грамадскасці. Упершыню праект аб'яднання школы і садка павінны былі разглядаць на паседжанні Беластоцкай гарадской рады яшчэ месяц таму, 17 студзеня. Але пасля з'яўлення петыцыі прэзідэнт Беластока Тадэвуш Трускаляскі тады выкрасліў гэты праект з парадку дня сесіі.
А цяпер вось ад папярэдніх планаў увогуле адмовіліся. Прынамсі пакуль.
Праўда, ёсць у справе беларускай адукацыі на Беласточчыне і яшчэ адзін нюанс, які таксама закранаў у сваім допісе Яраслаў Іванюк:
«Вельмі балючай справай з'яўляецца таксама і тое, што ў школе дзеці беларускіх эмігрантаў, у якіх няма польскага грамадзянства, не могуць вывучаць беларускую мову разам з дзецьмі беларускай меншасці. Віцэ-прэзідэнт горада Беласток Рафал Рудніцкі не адзін раз у афіцыйных лістах да беларускіх арганізацый пісаў, што ў гэтай справе беларусы павінны звяртацца ў дыпламатычныя прадстаўніцтвы Рэспублікі Беларусь».
Цяпер чытаюць
Лукашэнка заклікаў жыхароў Гомельшчыны не хвалявацца з-за ўльтыматуму Зяленскага адносна рэтранслятараў22
Каментары