Генштаб УСУ: Захоўваюцца прыкметы гатоўнасці кіраўніцтва Беларусі да ўдзелу ў вайне на баку Расіі
Беларускія войскі, сабраныя паблізу мяжы з Украінай, перагрупаваныя і прыведзеныя ў баявую гатоўнасць. Магчымы іх удзел у вайне на баку Расіі, аднак большасць вайскоўцаў супраць. Так сцвярджае Генштаб Узброеных сілаў Украіны.
У дзённай аператыўнай зводцы Генштаб Украіны паведаміў, што расійскія войскі працягваюць наступленне пры падтрымцы авіяцыі і высокадакладнай зброі. Іх асноўныя намаганні па-ранейшаму сканцэнтраваныя на стварэнні ўмоў для захопу Кіева, Харкава, Чарнігава, Сумаў, Марыупаля, Мікалаева і выхаду на межы Луганскай і Данецкай абласцей.
«У той жа час, захоўваюцца прыкметы гатоўнасці вайскова-палітычнага кіраўніцтва Беларусі да магчымага шырокамаштабнага ўдзелу Узброеных сілаў Беларусі ў баявых дзеяннях супраць Украіны на баку Расіі. Праведзена частковае перагрупаванне сухапутных войскаў і сілаў спецыяльных аперацый Рэспублікі Беларусь».
У прыватнасці, паведамляе ўкраінскі Генштаб, у раёне Брэста знаходзіцца па адной батальённа-тактычнай групе (БТГ) са складу 38-й асобнай дэсантна-штурмавой брыгады (Брэст) і 103-й паветрана-дэсантнай брыгады (Віцебск). У раёне Аляксандраўкі (раён пункта пропуску на мяжы з Кіеўскай вобласцю) — дзве БТГ 38-й асобнай дэсантна-штурмавой брыгады; у раёне Кірава (Палескі радыяцыйны запаведнік) — дзве БТГ 103-й паветрана-дэсантнай брыгады (усе гэтыя войскі адносяцца да ССА).
«Згаданыя падраздзяленні пераведзеныя ў вышэйшую ступень баявой гатоўнасці, але маральна-псіхалагічны стан асабістага складу з'яўляецца вельмі нізкім. Большасць вайскоўцаў інфармаваныя аб будучых дзеяннях і не жадаюць ваяваць на баку Расіі», — сцвярджае Генштаб УСУ.
Цяпер чытаюць
Дзмітрый Семчанка: Я прыйшоў у пул Лукашэнкі біцца з Расіяй4
Каментары