У Itransition звальняюць аддзел сорсінгу і прыпыняюць наём у Беларусі і Расіі
У Itransition у Беларусі пад скарачэнне трапіў аддзел сорсінгу колькасцю ў 30 чалавек. Акрамя таго, з 1 сакавіка кампанія прыпыніла наём у Беларусі. У беларускіх офісах Itransition працуе 2500 чалавек, паведамляе Dev.by.
«У аддзеле рэкрутынгу Itransition працуе каля 50 чалавек. З іх 30 — гэта асістэнты рэкруцёраў і сорсеры, а 20 — самі рэкруцёры. Увесь аддзел сорсінгу адправілі ў бестэрміновы адпачынак за свой кошт з 1 сакавіка. Пра гэта і прыпыненне найму ў РБ і РФ «у сувязі з сітуацыяй у свеце» паведамілі на агульным сазвоне», — распавёў работнік аддзела сорсінгу Itransition.
Гісторыю пацвердзіў яшчэ адзін супрацоўнік кампаніі, які сам патрапіў пад скарачэнне:
«Скарацілі 30 сорсераў і рэкруцёраў. Спачатку нас адправілі ў адпачынак за свой кошт і заблакавалі карпаратыўныя акаўнты, а сёння (8 красавіка) абвясцілі пра скарачэнне. Кіраўніцтва на сувязь не выходзіць, інфармацыю пра скарачэнне нам перадалі іншыя рэкруцёры.
Звальненні патлумачылі тым, што ў бліжэйшыя 2-3 месяцы найманне ў кампаніі цалкам спыненае. Яшчэ тыдзень таму нам казалі пра паляпшэнне сітуацыі і вяртанне супрацоўнікаў з прымусовага адпачынку. Сёння планы ў кіраўніцтва рэзка змяніліся».
Па словах крыніц, рэкруцёраў просяць пісаць заявы на звальненне па ўласным жаданні, кампенсацый не прапануюць.
У Itransition інфармацыю аб скарачэнні аддзела сорсінгу і прыпыненні найму ў Беларусі не пракаментавалі.
***
Itransition Group — міжнародная ІТ-кампанія ў галіне распрацоўкі праграмных рашэнняў і ІТ-кансалтынгу. Прадастаўляе комплекс паслуг па распрацоўцы ПЗ, інтэграцыі мабільных праграм, стратэгічнага і тэхналагічнага ІТ-кансалтынгу, тэставання, суправаджэння і падтрымкі ПЗ. Офісы ёсць у Беларусі, Расіі, Вялікабрытаніі, ЗША, Польшчы, Латвіі, збіраліся адкрыць у Літве.
Па даных 2021 года, у беларускіх офісах Itransition працуе 2500 чалавек (4-е месца ў краіне па памеры штату).
Цяпер чытаюць
Ад рэкету да продажу фота магіл. Як выглядае знутры групоўка Project X, якая вярбуе людзей для перавозкі мігрантаў з Беларусі ў ЕС4
Каментары