ПЛР-тэст для ўезду ў Літву больш не патрэбны нават невакцынаваным, іншаземцы з 1 мая могуць заязджаць у краіну па дакавідных правілах, паведаміла літоўскае Міністэрства аховы здароўя.
Да падарожнікаў, якія прыбываюць у Літву з любой краіны свету, больш не будуць прымяняцца ніякія абмежаванні, звязаныя з COVID-19:
- больш не трэба будзе здаваць тэст на COVID-19 перад паездкай, нават калі чалавек не прышчэплены ці не перахварэў на COVID-19;
- не трэба будзе запаўняць анкету;
- ніякім іншаземцам уезд забаронены не будзе.
Адначасова Літва адмяняе і ўнутраны рэжым надзвычайнай сітуацыі, уведзены з-за пандэміі. Гэта азначае, што больш не застанецца фактычна ніякіх абмежаванняў. Пра гэта расказалі віцэ-міністр аховы здароўя Аўшра Білотэне-Матэюнэне і іншыя спецыялісты Міністэрства аховы здароўя.
Маскі не будуць абавязковыя цяпер нават у транспарце, хоць Міністэрства аховы здароўя заклікае ўсё ж добраахвотна не забывацца на гэты сродак абароны.
Змяняецца і парадак тэставання на COVID-19. Будуць закрытыя мабільныя пункты, тэставанне будуць праводзіць у паліклініках, прытым толькі для жыхароў з сімптомамі.
Хворым не давядзецца ізалявацца, пытанне бальнічнага для іх будзе вырашаць лекар. У школах таксама не будзе перыядычнага тэставання вучняў.
Каментары