У Маскве 16 мая прайшла сустрэча кіраўнікоў дзяржаў Арганізацыі дамовы аб калектыўнай бяспецы. У ёй бралі ўдзел Аляксандр Лукашэнка, прэмʼер-міністр Арменіі Нікол Пашынян, прэзідэнт Казахстана Касым-Жамарт Такаеў, прэзідэнт Кыргызстана Садыр Жапараў, прэзідэнт Расіі Уладзімір Пуцін і прэзідэнт Таджыкістана Эмамалі Рахмон.
Сустрэча была прысвечаная 30-годдзю падпісання Дамовы аб калектыўнай бяспецы і 20-годдзю стварэння АДКБ.
Аляксандр Лукашэнка ў сваёй прамове адзначыў недахоп адзінства ў АДКБ. Ён прывёў у прыклад падзеі ў Казахстане і хуткую рэакцыю АДКБ, але цяпер ён не бачыць такога.
«На фоне жорсткага, ашалелага санкцыйнага прэсінгу з боку кансалідаванага Захаду пастулаты адзінства і салідарнасці спрацоўваюць далёка не заўсёды. Гэта бачна, на жаль, па галасаванні ў міжнародных арганізацыях. З маўклівай згоды нашых партнёраў Беларусь і Расія, насуперак усім законам міжнароднага жыцця, па капрызе Захаду шальмуюцца і выключаюцца з міжнародных арганізацый».
«Без хуткага згуртавання нашых краін, умацавання палітычных, эканамічных, вайсковых сувязей нас заўтра можа не быць», — сказаў Лукашэнка.
Паводле яго, калі б краіны АДКБ «выступілі адзіным фронтам, не было б гэтых пякельных, як яны [на Захадзе] кажуць, санкцый».
У той жа час Нікол Пашынян наракаў, што АДКБ не дапамагла Арменіі падчас яе канфлікту з Азербайджанам і, больш за тое, некаторыя краіны АДКБ — тлусты намёк на Беларусь — працягвалі пастаўкі зброі Баку.
Уладзімір Пуцін гаварыў пра тое, што Захад адмаўляецца бачыць «нацыстаў» ва Украіне, а амерыканскія біялабараторыі збіралі біяматэрыял і вялі там распрацоўку біялагічнай зброі.
Пракаментаваў ён і пашырэнне НАТА. Паводле яго, уступленне Фінляндыі і Швецыі ў НАТА не стварае пагрозы для Расіі, але пашырэнне ваеннай інфраструктуры на гэтых тэрыторыях «выкліча рэакцыю ў адказ».
Кіраўнікі дзяржаў, што ўваходзяць у АДКБ, падпісалі шэраг шматбаковых дакументаў па выніках саміту. Сярод іх — заява Рады калектыўнай бяспекі АДКБ у сувязі з 30-годдзем самой дамовы і 20-годдзем абʼяднання.
Як раней паведаміў Пуцін, плануецца ў тым ліку падпісаць сумесную заяву, у якой будзе пацверджаная рашучасць краін АДКБ «і ў далейшым па-партнёрску ўзаемадзейнічаць па розных напрамках ваеннага і абароннага будаўніцтва, нарошчваць скаардынаваныя дзеянні на міжнароднай арэне».
Увагу журналістаў прыцягнула тое, што Аляксандр Лукашэнка на ўрачыстым выхадзе кульгаў, але аж ззяў. У той жа час Касым-Жамарт Такаеў і Эмамалі Рахмон былі як хмары.
Рухі ног і рук Уладзіміра Пуціна зноў прымусілі звярнуць на сябе ўвагу.
Пашынян раскрытыкаваў АДКБ за дзеянні падчас вайны Арменіі з Азербайджанам
«Наша Нiва» — бастыён беларушчыны
ПАДТРЫМАЦЬ
Каментары