З 1 чэрвеня існуючы тралейбусны маршрут №22 (Карастаянавай — Якуба Коласа) падоўжаць да Лошыцы.
Ад плошчы Якуба Коласа тралейбус пойдзе па праспекце Незалежнасці, вуліцы Бабруйскай праз вакзал, вуліцах Свярдлова, Маякоўскага, Ігуменскім тракце, вуліцы Янкі Лучыны і Прушынскіх да дыспетчарскай станцыі «Лошыца-2».
Тралейбусныя правады на праспект вяртаць не сталі, таму частку маршруту — па праспекце Незалежнасці, а таксама па вуліцах Янкі Лучыны і Прушынскіх тралейбусы паедуць на акумулятарах, без «рагоў».
Адначасова з гэтым адмяняюцца два аўтобусныя маршруты №38 «Бабруйская — Карастаянавай» №123 «Лошыца—2 — Плошча Незалежнасці».
Тралейбусны маршрут па галоўным праспекце Мінска існаваў з 1952 года; у момант найбольшай працягласці лініі на тралейбусе №1 можна было праехаць ад вакзала да Усхода і далей па Каліноўскага ў Зялёны Луг. Таксама амаль па ўсёй даўжыні праспекта хадзіў тралейбус №2: ад аэрапорта «Мінск-1» да дыспетчарскай станцыі Каліноўскага.
На ўчастку ад плошчы Незалежнасці да плошчы Якуба Коласа тралейбусны рух спыніўся ў 2002 годзе: тралейбус №1 замянілі аўтобусам №100, а да 2006 знялі правады і на ўчастку да вуліцы Філімонава.
