Дачка Надзеі Ермаковай пастаўляе рыбу ў калоніі, бальніцы і сілавікам
Рыбная кампанія малодшай дачкі экс-кіраўніцы Нацбанка Надзеі Ермаковай зарабляе мільёны рублёў на пастаўках рыбы ў лякарні, калоніі, СІЗА і вайсковыя часці, піша «Бюро».
Дачка Ермаковай Юлія Кухарэнка (у дзявоцтве Ермакова) разам з мужам Аляксандрам Кухарэнкам сумесна валодаюць кампаніяй «Белае мора». Фірма — імпарцёр рыбы і морапрадуктаў у Беларусь.
Дачцэ Ермаковай належыць 15% долі, яе мужу — 34%. Астатняя доля ў грамадзяніна Расіі і свёкра Юліі — Юрыя Кухарэнкі.
«Бюро» вывучыла тэндары кампаніі і даведалася, што фірма сям’і Кухарэнка актыўна пастаўляе рыбу і іншую замарожаную прадукцыю ў папраўчыя калоніі, СІЗА, абласныя, гарадскія і раённыя бальніцы, дамы-інтэрнаты, вайсковыя часткі, памежнаму камітэту і іншым установам.
Толькі за шэсць месяцаў 2025 года «Белае мора» паставіла прадукцыі на суму звыш трох мільёнаў рублёў. Самыя буйныя закупы належалі Дзяржаўнаму памежнаму камітэту — на 875 тысяч рублёў, Дэпартаменту выканання пакаранняў МУС (гэта СІЗА, калоніі і іншыя тыпы папраўчых устаноў) — на 952 тысячы рублёў, Галоўнаму ўпраўленню камандуючага ўнутраных войскаў МУС РБ — на 679 тысяч рублёў.
У 2024 годзе выручка кампаніі склала 75 мільёнаў рублёў, а чысты прыбытак 1,4 мільёна. У 2024 годзе ў «Белага мора» каля тысячы разнастайных паставак дзяржаўным арганізацыям.
Раней «Люстэрка» сумесна з BelPol расказвала пра маёмасць сям’і Юліі Кухарэнкі. Ва ўласнасці ў Юліі і яе мужа Аляксандра шэраг дарагой нерухомасці ў Мінску. Дачка Ермаковай прапісаная ў цэнтры Мінска — у чатырохпакаёвай кватэры ў ЖК «Славянскі квартал». Паводле дамовы дарэння яе ўладальнікам лічыўся старэйшы сын шлюбнай пары — Міхаіл, цяпер яму 14 гадоў. На імя Юліі былі зарэгістраваныя дзве аднапакаёвыя кватэры ў доме 2017 года пабудовы на вуліцы Грыбаедава.
Аляксандр Кухарэнка валодае мінскай кватэрай на вуліцы Жукоўскага. Яшчэ на яго зарэгістраваны зямельны ўчастак для будаўніцтва і абслугоўвання жылога дома ў вёсцы Дзічкі (гэта недалёка ад Заслаўскага вадасховішча і за 20 км ад МКАД). Таксама на мужчыну зарэгістраваныя два адміністрацыйныя памяшканні.
Цяпер чытаюць
Хто тая беларуска, якую экстрадавалі ў ЗША для суда за кантрабанду дэталяў для самалётаў8
Каментары