Мы ўпакоўваем у яе бутэрброды, запякаем у ёй рыбу ці мяса. Алюмініевая фольга палягчае побыт, але ёсць нюансы.
Алюміній — трэці па распаўсюджанасці метал у свеце, у складзе зямной кары яго 8%. Мы сутыкаемся з алюмініевымі рэчамі ў сябе дома і ва ўласных машынах, але звычайна гэты метал нам не шкодзіць.
Усё змяняецца, калі ён разам з ежай трапляе ў нашу стрававальную сістэму, а гэта здараецца дужа часта, бо алюміній — цудоўны эмульгатар і харчовы адбельвальнік. Ён таксама ўваходзіць у склад харчовых фарбавальнікаў і рэчываў, якія робяць ежу больш цвёрдай ці перашкаджаюць яе склейванню.
Дадаткі з алюмініем можна знайсці ў муцэ, малаку, ёгуртах, плаўленых сырах, джэмах, разрыхляльніку, а таксама ў чаі і сухіх прыправах: маяране, базіліку і чорным перцы. Алюміній ёсць у леках і касметычных сродках, напрыклад, у дэзадарантах, алюмініевыя злучэнні выкарыстоўваюць пры ачышчэнні вады ў водаправодах.
Па меркаваннях экспертаў, дапушчальна, калі за суткі ў арганізм чалавека трапляе не больш за 60—80 міліграмаў алюмінію. Наша цела добра выводзіць невялікія аб’ёмы гэтага металу: калі ў чалавека няма праблем з ныркамі, то 95% алюмінію выйдзе з яго арганізма з мачой.
Але калі мы ўжываем занадта шмат алюмінію, з яго вывадам могуць узнікнуць цяжкасці. Гэта бывае, калі мы празмерна часта ўжываем апрацаваныя прадукты, выкарыстоўваем алюмініевы посуд ці фольгу з гэтага металу. У выпадку ныркавай недастатковасці алюміній можа назапашвацца ў тканках, і чым старэйшы чалавек, тым больш актыўна гэта адбываецца.
Калі ў арганізме шмат гадоў запар накопліваецца алюміній, гэта павышае рызыку хвароб Паркінсана і Альцгеймера, а таксама рызыку астэапарозу і хвароб нервовай сістэмы. Горшае праца падстраўнікавай залозы і кішачніка. Злучэнні алюмінію — чужародныя для імуннай сістэмы, таму яны могуць выклікаць хранічнае запаленне ў арганізме, якое, у сваю чаргу, прывядзе да алергіі, астмы, аўтаімунных захворванняў і іншых хвароб.
Як адмовіцца ад фольгі
Звыклая нам алюмініевая фольга, якой бы зручнай яна ні была, у гэтым плане не самая бяспечная рэч. Яшчэ ў 90-х было даказана, што гэты метал можа трапляць у кіслыя прадукты з алюмініевай тары, у якой мы іх захоўваем, і чым даўжэй прадукты там ляжаць, тым вышэйшая доля алюмінію ў іх.
Таму, напрыклад, не варта запякаць у фользе рыбу з лімонам, бо лімон увойдзе ў рэакцыю з фольгай, і ўтворацца шкодныя солі алюмінію. Аналагічны эфект будзе, калі з фольгай будуць кантактаваць таматы, шпінат, брокалі, цытрусавыя, квашаная капуста ці марынаваныя агуркі. Дадамо ў гэты спіс і стравы з вялікай колькасцю прыпраў.
Ежу, загорнутую ў алюмініевую фольгу, не варта захоўваць у халадзільніку. У такой фользе не рэкамендуюць запякаць прадукты ці награваць іх. Замест гэтага вы лепш загартаць прадукты ў пергаментную паперу, а потым у алюмініевую фольгу, ці выкарыстоўваць папяровыя пакеты або пластыкавыя кантэйнеры, на якіх ёсць пазнака, што ў іх можна захоўваць прадукты. Гатаваць ежу можна ў посудзе з тэрмаўстойлівага шкла, нержавеючай сталі ці чыгуну.
Каментары