Расіянін вяртаўся на вайну з пахавання бацькі, забітага на той жа вайне ва Украіне, і загінуў у ДТЗ якраз каля помніка вайскоўцам
У навагоднюю ноч у мужчыны нарадзілася дачка, якую ён ужо не пабачыў.
31-гадовы ўдзельнік вайны ва Украіне Дзяніс Дацэнка вярнуўся дадому, у пасёлак Елань Валгаградскай вобласці на пахаванне бацькі, які загінуў ва Украіне. І сам загінуў каля помніка загінулым воінам пад Растовам, піша v1.ru.
У ноч з 1 на 2 студзеня Дацэнка вяртаўся на фронт, але трапіў пад колы аўто на трасе якраз у той момант, калі даведаўся пра нараджэнне дачкі. Мужчыну збіла машына непадалёк ад помніка загінулым воінам «Жураўлі» ў Растоўскай вобласці.
— Месяц таму ён праводзіў у апошні шлях свайго бацьку, які загінуў у СВА (так у Расіі называюць вайну з Украінай — НН), а сам загінуў у той момант, калі ў ягоным жыцці з'явілася малая, сэнс жыцця… Якую ён так ніколі не ўбачыць… — напісалі знаёмыя Дзяніса ў сацыяльных сетках.
Як распавялі V1.RU сябры і знаёмыя Дзяніса, на вайну ён трапіў падчас мабілізацыі верасня 2022 гады. Да гэтага працаваў кіроўцам у мясцовага прадпрымальніка.
— Дзяніс прыехаў у водпуск, каб пахаваць бацьку. З бацькам развіталіся 6 снежня ў Елані. 2 студзеня ён вяртаўся назад, на СВА.
Перад Растовам Дацэнка спыніўся і выйшаў з машыны. Яму ў гэты момант жонка патэлефанавала і сказала, што толькі што нарадзіла дачку. І яго адразу пасля гэтай навіны збіла машына, — распавядаюць таварышы Дзяніса Дацэнка. — Адбылося гэта прыкладна ў 04:30 раніцы [з 1 на 2 студзеня]. Мы да гэтага часу не можам ачуцца, таму што месяц таму было толькі пахаванне яго бацькі, таксама ўдзельніка СВА, уяўляеце? Такая трагедыя… Нават не ў баі, а проста ў ДТЗ, гэта жахліва.
Размешчаны на 1040-м кіламетры трасы паміж Растовам-на-Доне і Навашахцінскам мемарыяльны комплекс, побач з якім загінуў Дзяніс Дацэнка, прысвечаны салдатам, якія не вярнуліся дадому і назаўжды засталіся на палях бітваў. З аднаго боку дарогі знаходзіцца стэла з жураўлямі, якія адлятаюць у нябыт, а з другога боку — скульптура Радзімы-маці, якая чакае сваіх сыноў.
Каментары