Міністр культуры Украіны выключыў дэмантаж манумента «Бацькаўшчына-маці» ў Кіеве
Міністр культуры Украіны Аляксандр Ткачэнка лічыць заклікі да дэмантажу манумента «Бацькаўшчына-маці» ў Кіеве абсурдам. У эфіры адзінага тэлемарафона ў нядзелю ён сказаў, што гэта адна з візітовак Украіны, а грошы, якія былі б патрэбныя на дэмантаж, можна выдаткаваць з большай карысцю.
«Зносіць славутасць, якая з'яўляецца адной з візітовак Украіны, якая глядзіць на ўсход, якая велізарная атракцыя для многіх турыстаў, мне здаецца абсурдам у гэты час. У нас ёсць на што траціць сродкі. У нас няма сродкаў у бюджэце, таму што яны пайшлі на абарону і на падтрымку сацыяльнай сферы.
Музеі Галадамору, нам трэба пабудаваць музей Герояў Нябеснай сотні, трэба працаваць з многімі аб'ектамі — гэта больш за 450 аб'ектаў, якія атрымалі пашкоджанні або былі разбураныя падчас вайны. А займацца дэмантажом «Бацькаўшчыны-маці» можна толькі ў хваравітым уяўленні», — сказаў Ткачэнка.
У ліпені ў мабільнай праграме «Дія» ўкраінцы праводзілі апытанне, што рабіць з гербам СССР на шчыце «Бацькаўшчыны-маці». 85% рэспандэнтаў заявілі, што яго трэба замяніць на Трызуб.
Па словах Ткачэнкі, работы з гербам СССР на шчыце манумента могуць пачацца прыкладна праз паўгода.
«Думаю, што пасля зацвярджэння плана дзеянняў, які нам падаў музей Другой сусветнай вайны — прадугледжана тэхнічнае абследаванне, прыцягненне спецыялістаў для праектнай дакументацыі — павінна прайсці дзесьці паўгода ці крыху больш для таго, каб мы ўшчыльную прыступілі ўжо да работ», — сказаў міністр.
У 2019 годзе кіраўнік Украінскага інстытута нацыянальнай памяці Антон Драбовіч казаў, што дэкамунізацыя манумента «Бацькаўшчына-маці» будзе каштаваць вельмі дорага. Паводле яго слоў, у Інстытута электразваркі імя Патона ёсць рашэнне, як дэмантаваць савецкі герб, але яно дарагое.
«Праблема ў чым? Каб проста зрэзаць яго ці нагрузіць люлькай — яна можа проста пераважыць.
Там вельмі складаная інжынерная канструкцыя, яе нельга разбалансаваць, там маятнік у руцэ з мячом, які ўраўнаважвае статую. Калі мы павесім шмат інжынерных прыладаў, каб здымаць, дэмантаваць гэты шчыт, ён можа перакуліць статую», — тлумачыў Драбовіч.
Згодна з прынятым у 2015 годзе Законам аб забароне камуністычнай сімволікі мясцовыя ўлады абавязаныя знесці ўсе помнікі савецкім дзеячам. Але нягледзячы на тое, што помнік «Бацькаўшчына-маці» звязаны з камуністычным рэжымам, яго вырашылі не дэмантаваць. А савецкі герб са шчыта збіраліся прыбраць калісьці пазней.
«Бацькаўшчына-маці» — манументальная скульптура ў Кіеве, размешчаная на высокім правым беразе Дняпра на тэрыторыі Нацыянальнага музея гісторыі Украіны ў Другой сусветнай вайне. Адкрытая ў 1981 годзе, лічыцца самай высокай манументальнай скульптурай у Еўропе.
Цяпер чытаюць
«Пайшлі нах*й вы і ваш «Бацька», пі***асы!» П'яныя прыгоды зрабілі армяніна Ярванда палітвязнем. Цяпер ён змагаецца з праблемамі ў Польшчы13
Каментары