Намеснік міністра ЖКГ абяцае, што ніхто не будзе хадзіць, мераць і штрафаваць за 21 см.
У Міністэрстве жыллёва-камунальнай гаспадаркі Беларусі расказалі, што будзе, калі не скошваць на ўчастку траву вышэйшую за 20 сантыметраў.
Паводле слоў намесніка міністра ЖКГ Андрэя Рамашкі, новаўвядзенні, замацаваныя пастановай Савета міністраў нумар 267 ад 16 мая 2025 года, не з’яўляюцца нечым прынцыпова новым. Раней аналагічныя нормы ўжо існавалі — але былі раскіданыя па розных тэхнічных дакументах.
«У Год добраўпарадкавання мы вырашылі аб’яднаць намаганні дзяржавы, арганізацый і грамадзян, каб навесці парадак і надаць эстэтычнасць населеным пунктам. Таму правілы былі структураваныя — зараз яны ахопліваюць і прыдамавыя тэрыторыі, і ўчасткі, замацаваныя за прадпрыемствамі», — патлумачыў Андрэй Рамашка інфармагенцтву БелТА.
Асобным пунктам намеснік міністра пракаментаваў рэзанансную тэму скошвання травы. Паводле яго слоў, і тут размова ідзе не аб новых патрабаваннях. З 2020 года дзейнічаюць правілы па ўтрыманні азелянёных тэрыторый, дзе ўжо прапісаны парадак догляду за газонамі, уключаючы і вышыню травянога покрыва.
«Але гэта не сведчыць аб тым, што нехта будзе хадзіць і вымяраць вышыню травы, і калі яна будзе 21 см, то даваць штраф. Гэтыя нормы неабходныя, каб разумець, калі своечасова выконваць работы па ўтрыманню газонаў і навядзенню парадку на азелянёных тэрыторыях», — удакладніў Рамашка.
Нягледзячы на тое, што за парушэнне правілаў прадугледжана адміністрацыйная адказнасць, улады робяць акцэнт на прафілактыцы. «Гэта меры папераджальнага характару. На сёння мы з аблвыканкамамі прапрацоўваем гэта пытанне. Мэта не вылоўліваць і караць людзей, а пагаварыць, давесці да ведама патрабаванні і пракантраляваць іх выкананне», — зазначыў намеснік міністра.
Апытанка
Цяпер чытаюць
Ці варта купляць закінутую хату за адну базавую і колькі гэта каштуе насамрэч? Вось што расказваюць людзі1
Каментары