Самы пазітыўны чалавек у Беларусі: Раман Галоўчанка заявіў, што ні пра якую рэцэсію ў эканоміцы не можа ісці гаворка
Сёння прэм’ер-міністр Беларусі быў на Рагачоўскім малочна-кансервавым камбінаце і даў свой прагноз «па росце ВУП».
Зніжэнне валавага ўнутранага прадукту, па ягоных словах, звязанае ў першую чаргу з санкцыйнымі абмежаваннямі і пазнейшымі тэрмінамі пачатку сельскагаспадарчых работ.
«Ужо ў жніўні мы прадэманструем больш эфектыўныя лічбы па ВУП. Яго зніжэнне звязана ў тым ліку з пытаннямі сельскагаспадарчай галіны, таму што сёлета было сур'ёзнае зрушэнне ўсіх агранамічных тэрмінаў: па ўборачнай кампаніі аграрыі ідуць на 2-3 тыдні пазней. Адпаведна, атрымаўся невялікі правал. Да канца жніўня будзе набраны добры тэмп, і нават на гэтым фоне паказчык ВУП палепшыцца», — сказаў Галоўчанка.
Прэм’ер поўны пазітыву: усе пастаўленыя задачы ў эканоміцы будуць выкананыя, прыбытак прадпрыемстваў-флагманаў расце, а крэдытная запазычанасць — зніжаецца. А па выніках года Беларусь нібыта чакае рэкорднае знешнегандлёвае сальда.
Па словах Галоўчанкі, ні пра якую рэцэсію сёння гаворкі быць не можа: «Рэцэсія — гэта калі зніжаецца аб'ём вытворчасці і паступленне даходаў, разганяецца інфляцыя».
У той жа час факты сведчаць пра адваротнае. ВУП Беларусі за сем месяцаў упаў на 5,2%, прычым спад паскараецца, а рэальныя даходы беларусаў упалі на 2,7%. Аб'ём вытворчасці сельгаспрадукцыі скараціўся на 10,4%, але тут сапраўды не ўсё так кепска.
Каментары