«У аўтобусе былі дзеці і нават такса». Пасажыры рэйса Мінск — Варшава правялі ноч на запраўцы пад Баранавічамі
Пасажыры аўтобуснага рэйса Мінск — Варшава кампаніі Intercars правялі ноч на запраўцы пад Баранавічамі. Аўтобус зламаўся неўзабаве пасля выезду, а падменны не прыехаў. Пакуль кіроўцы ездзілі ў Баранавічы рамантаваць аўтобус, людзі начавалі хто як на АЗС.
Пасажыры распавялі www.abw.by, што аўтобус адправіўся з аўтавакзала «Цэнтральны» ў Мінску своечасова, 25 жніўня ў 21:05. У 6:05 на наступны дзень ён павінен быў прыбыць на аўтавакзал «Заходні» ў Варшаве. Але не быў.
Першы тэхнічны прыпынак вадзіцелі зрабілі ўжо на 15-й хвіліне рэйса, на праспекце Дзяржынскага ў Мінску.
«Ехалі, дзьмула гарачае паветра, у салоне было як у духавой шафе. Мы — піражкі», — жартуе пасажыр аўтобуса Марыя.
Прыблізна ў 23:00 аўтобус спыніўся праз паломку ўжо на трасе. Тут пасажыры затрымаліся на паўтары гадзіны.
Потым аўтобус падастыў, людзей адвезлі на бліжэйшую запраўку недалёка ад Баранавічаў.
Кіроўцы сказалі: «Лопнуў шланг сістэмы ахаладжэння рухавіка».
Сем чалавек удалося пасадзіць на аўтобус, які праязджаў міма, да Варшавы. Астатнім сказалі чакаць да 8 раніцы, а аўтобус паедзе на рамонт. Падменнага транспарту не было.
«На запраўцы дзеці леглі на лавачкі, астатнія стаялі гадзінаў шэсць, усю ноч. Раніцай кіроўца адтэлефанаваўся, што адрамантаваўся. У 6:20 аўтобус нарэшце вярнуўся па нас. Да гэтага часу некаторыя людзі зʼехалі ў Мінск, іншыя ўзялі таксі да Брэста», — працягвае Марыя.
«Добра, мы нікуды асабліва не спяшаемся: у Варшаве бярэм аўто напракат і едзем па Еўропе. Але ў людзей былі квіткі на самалёты, яны спазняліся на рэйсы! У нас узнікалі думкі вярнуцца ў Мінск па сваю машыну. У аўтобусе былі дзеці і нават такса — яна трымалася малайцом», — распавяла пасажырка.
Са шматгадзінным спазненнем аўтобус такі прыбыў на мяжу ў пункт пропуску «Брэст».
Там падарожнікаў чакаў яшчэ адзін форс-мажор: афармленне транспарту было спыненае праз аўтамабіль Kia з прадметам, падобным да выбуховага прыстасавання, пад днішчам.
«І ніхто не здзівіўся. Ці ў людзей перагарэлі нервы, ці ўжо стала ўсё роўна», — распавядае Марыя.
У кампаніі «Інтэркарс» карэспандэнту «Аўтабізнесу» адказалі, што пасажыры могуць пісаць прэтэнзіі на электронную пошту кампаніі, пасля будуць прымацца тыя ці іншыя рашэнні.
Гэта ўжо другая гісторыя з аўтобусамі Intercars за месяц. У ліпені дзяўчыну знялі з рэйса Варшава — Мінск і яе ж абвінавацілі ў няпільнасці.
Чытайце таксама:
Дзяўчыну знялі з рэйса Варшава — Мінск. Сама вінаватая?
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»1313
Каментары
часам такое здараецца. гэта форс-мажор.
так мы аднойчы заначавалі на аўтавакзале ў Краснаперакопску (гэта было даўно - задоўга да 14-га). затое праз такі неспадзяваны прыпынак дазналіся, што ў Краснаперакопску такі ж быданак рынка, як наша Камароўка, толькі ў 3 разы меньшы. раніцай аўтобус шчэ не быў гатовы, і мы пайшлі пазнаёміцца з ваколіцамі. і вось пабачылі такі да болю знаёмы будынак. Камароўка кланавалася)