NYT: У вайне чакаецца зімовая паўза, яна можа працягнуцца да шасці месяцаў
Чакаецца, што зіма прывядзе да запаволення ваенных поспехаў з боку як Расіі, так і Украіны, піша The New York Times.
Высокапастаўленыя чыноўнікі адміністрацыі Байдэна заяўляюць, што ваенныя аперацыі Расіі ва Украіне застануцца ў тупіку і ў наступным годзе, бо нядаўнія поспехі Украіны сарвалі надзеі Масквы захапіць больш тэрыторый у раёнах, якія Пуцін спрабаваў прадставіць як гістарычную частку Расіі.
Зімовая паўза можа працягнуцца да шасці месяцаў. Дождж і мяккая зямля ў канцы лістапада замарудзяць рух абедзвюх армій. Затым, калі тэмпература знізіцца і зямля замерзне, танкам і грузавікам будзе лягчэй перасоўвацца. Але верагоднасць моцных снегападаў і яшчэ больш халоднага надвор'я можа абцяжарыць для дрэнна абсталяванай расійскай арміі правядзенне любога новага наступу.
«Вы ўжо бачыце, што дажджлівае надвор'е ва Украіне трохі запавольвае ход падзей», — заявіў журналістам на мінулым тыдні Колін Х. Каль, намеснік міністра абароны па пытаннях палітыкі.
У такіх умовах, па словах афіцыйных асоб ЗША, Расія, верагодна, узмоцніць свае атакі на інфраструктуру, каб тэрарызаваць украінцаў.
Чыноўнікі адміністрацыі Байдэна кажуць, што вельмі важна выкарыстоўваць зімовае запаволенне для аднаўлення пастаўкі Украіне абарончай і наступальнай зброі.
У чацвер Пентагон абвясціў пра закупку зброі яшчэ на 400 мільёнаў даляраў, уключаючы мабільныя сродкі СПА малой далёкасці Avenger, якія страляюць ракетамі Stinger.
Але афіцыйныя асобы ў Кіеве кажуць, што ім спатрэбіцца больш сістэм супрацьпаветранай абароны, танкаў і знішчальнікаў, каб вярнуць раёны, якія Пуцін незаконна анексаваў за апошнія дзевяць месяцаў вайны.
Са слоў некаторых вайсковых аналітыкаў, падчас паўзы абодва бакі таксама правядуць перападрыхтоўку войскаў і падрыхтуюцца да новага наступу ў лютым.
Па словах амерыканскіх чыноўнікаў, з-за праблем з абсталяваннем і прытокам нядаўна прызваных салдат, якіх трэба будзе вучыць, Расія, хутчэй за ўсё, спадзяецца выкарыстаць зімовую паўзу для аднаўлення.
Разам з тым запаволенне не азначае спынення вайны. Спадар Каль, высокапастаўлены чыноўнік міністэрства абароны, сказаў: «Рускія, здаецца, маюць намер працягваць наносіць удары крылатымі ракетамі і іранскімі беспілотнікамі па ўкраінскай грамадзянскай інфраструктуры».
Масква можа працягваць у тым жа духу, сказаў ён, «так што вайна будзе працягвацца, нават калі яе інтэнсіўнасць крыху зменіцца».
Што за 17-гадовы стартапер, які выліў цэбар хлусні на Лібера на радасць беларускім спецслужбам7
Каментары